Në daljen e tij të parë për mediat nga selia e Partisë Demokratike për vitin 2023, kreu i saj Sali Berisha është ndalur fillimisht te përplasja e brendshme në selinë blu dhe vendimin absurd të Enkelejd Alibeajt për përjashtimin e deputetëve Tritan Shehu, Belind Këlliçi, Agron Shehaj dhe Oerd Bylykbashi.
Duke e quajtur “zbatonjës” së urdhrave të kryeministrit Edi Rama, Berisha u shpreh kundër vendimit, por theksoi se kjo nuk do e ndalë Grupin Parlamentar të PD për të mbrojtur interesin e shqiptarëve.
“Zbatonjësi mjeran i urdhrave të Edi Ramës. I keqpërdorur në shkallën më ekstreme nga Edi Rama. Zbatoi një urdhër të Edi Ramës duke shkelmuar dhe më shumë mbi dinjitetin e tij. E ardhmja e grupit parlamentar, do jetë një grup i cili do të mbrojë me gjithë potencialin e vet interesat e qytetarëve. Do bëjë gjithçka për të shumëfishuar kontrollet”, tha ai.
I pyetur lidhur me zërat se deputeti Ervin Salianji do të mbledhë firmat për të zëvendësuar Alibeajn si kryetar të Grupit, Berisha tha se e mbështet atë në qoftë se arrin të fitojë besimin e deputetëve të PD-së.
“Unë do të pranoj vullnetin e demokratëve. Zoti Salianji është nënkryetar, unë do të pranoj pa diskutim vullnetin e deputetëve të Partisë Demokratike”, theksoi Berisha.
