PD depozitoi këtë të Martë në Prokurorinë e Posaçme kallëzim ndaj kryetarit të Bashkisë së Tiranës, Erion Veliaj.
Kryebashkiaku akuzohet për gjashtë vepra penale lidhur me tenderin e një rruge, të cilësuar “elektoral” nga opozita. Tenderi që pas procedurës së çeljes u anulua nga bashkia, për PD-në, ishte i paracaktuar.
Ishte deputetja demokrate Albana Vokshi, ajo e cila depozitoi kallëzimin në SPAK. Në një deklaratë për gazetarët pas daljes nga prokuroria, Vokshi bëri apel që SPAK të nisë menjëherë një hetim të thelluar dhe profesional ndaj Erion Veliajt.
“Si Veliaj shkeli ligjin”
Vokshi theksoi se Veliaj u kap në shkelje të rëndë për punimet në rrugën ‘John Belushi’, në kryeqytet.
“Ka qenë kandidati i opozitës, Belind Këlliçi i cili e ka kapur në shkelje të rëndë, në flagrancë Erion Veliajn, i cili ka nisur punimet në rrugën ‘John Belushi’. E ka kapur në tentativë, në vjedhjen e 471 milionë lekëve të cilat do t’i kalonin fiktivisht më pas një kompanie, ku më tej do t’i përdorte për fushatë elektorale, për blerje votash. Në tentativë për të mbuluar këtë vjedhje, Erion Veliaj përsëri dje mashtroi, dhe falsifikoi dokumetat e këtij tenderi”, tha Vokshi.
6 akuza
Deputetja renditi gjashtë akuzat penale të ngritura ndaj Veliaj në kallëzim, ndërsa një apel e bëri edhe për Prokurorinë e Posaçme.
“Kjo është arsyeja që ne jemi sot këtu, duke i kërkuar SPAK-ut që të regjistrojë këtë kallëzim penal dhe të nisë menjëherë hetimet për Kryetarin e Bashkisë Tiranë, Erion Veliaj, dhe për veprat e mëposhtme: që janë shpërdorimi i detyrës, neni 248 i kodit penal, shkelje e barazisë së pjesëmarrësve në tendera dhe ankandeve publike, parashikuar në nenin 258, korrupsion aktiv në zgjedhje, përdorimi i funksionit publik për veprimtari politike dhe zgjedhore, falsifikimi i dokumenteve dhe mashtrim”, tha Vokshi.
“Ajo që i kërkojmë ne SPAK-ut është që të tregojë që është në lartësinë e detyrës, dhe të besimit që i ka dhënë publiku, ashtu edhe opozita. Ne i kërkojmë SPAK-ut që të fillojë urgjentisht, duke kërkuar edhe sekuestron e të gjithë dokumentacionit të tenderit, dhe të fillojë menjëherë një hetim të thelluar dhe profesional”, shtoi ajo.
Kallëzimi në SPAK u lajmërua edhe më herët gjatë ditës nga Albana Vokshi, përmes një deklarate nga selia blu.
