Nga Boldnews.al
Në ditët e para të vitit 2023, Erion Veliaj, kryetari i Bashkisë së Tiranës, ka shpejtuar për të shkuar në zyrë. Nuk ka firmosur ndonjë ndihmë për më të varfërit, rikonstruksione çerdhesh. As të shumëpriturat kredi të buta, pasi s’ka dalë lista e dytë.
Por ka firmosur tendering e rrugës së fshatit “Rolling Hills”. I fshatit të të pasurëve, që doli edhe në librat e fëmijëve. Të gjithë janë vënë në “shërbim” të tyre. Autoriteti Rrugor Shqiptar bëri enkas një rrethrrotullim 14 milionë euro, që edhe u përmbyt. Ndërkohë, pa kaluar shumë kohë nga ky investim, Bashkia e Tiranës po bën një tender me vlerë 3 miliardë lekë të vjetra për një rrugë disa qindra metra. BoldNews.al ka siguruar dokumentet e këtij tenderi, ku sipas hartës, rruga do të shkojë pikërisht në “Rolling Hills”. Nëse deri më tani kalonin në një rrugë pak metra më larg, më të pasurit e Shqipërisë kanë kërkuar rrugë “private”, por me taskat e të varfërve.
Në ditën e parë të punës për Vitin 2023, Veliaj ka firmosur një procedurë tenderimi me objket “ndërtimi i infrastrukturës lidhëse me autostradën Tiranë-Elbasan”. Në fakt, Bashkia e Tiranës i ka “fshehur” pak punët në këtë objekt, por në dokumentet që shfletoi BoldNews.al bëhet fjalë për rrugën e fshatit të të pasurëve. Fondi limit i këtij tenderi ishte plot 277.012.566 lekë pa TVSH, ose rreth 2.8 milionë euro. Të ardhurat për këtë rrugë do të jenë nga Bashkia e Tiranës, e cila do të përdorë fondin e lënë pezull të vitit 2022. Por, pas këtij tenderi me shumë të drejtë lindin disa dyshime, pasi po bëhet vetëm disa muaj para zgjedhjeve dhe aq më tepër po i vjen në ndihmë një grushti njerëzish të pasurish, të cilët kanë rrugë për të shkuar në vilat miliona euroëshe. Madje, me ato investime, mund ta kishin bërë edhe vetë rrugën. Por, për ta mendon “babagjyshi” Lali Eri, i cili duket se po kërkon “ndihmë” në këto muaj!
BoldNews.al shfletoi dokumentet shoqëruese të këtij tenderi, ku ndryshe nga objekti i parë “rrugët lidhëse me autostradën Tiranë-Elbasan”, në brendësi është nxjerrë “koka”. Bashkia shkruan se bëhet fjalë për rrugën “TEG – Secret Garden”, e cila shtrihet në pjesën juglindore të qytetit të Tiranës, në zonën e Lundrës. “Objekti ka shtrirje lineare me një gjatësi rreth 1100 ml. Rruga shtrihet në një nga zonat periferike të Tiranës e cila ka marrë zhvillim të rëndësishëm vitet e fundit. Rruga do ndërtohet pothuaj tërësisht e re, kalon pranë disa zonave të banuara dhe kufizohet herë nga parcela bujqësore dhe herë nga objekte banimi apo biznesesh” thuhet në këto dokumente.
Bashkia thotë se objekti i projektit do të jetë ndërtimi i një rruge të re e cila do të lidhë zonën e Lundrës me autostradën Tiranë – Elbasan dhe Unazën e Madhe. “Ndërtimi i kësaj rruge me të gjithë elementët e infrastrukturës rrugore dhe urbane, behet me qëllim përmirësimin e cilësisë së jetës së komunitetit të kësaj zone dhe krijimin e akseseve të lëvizjes me rrugët e tjera të qytetit” shruan Veliaj. Vërtetë? Do t’u rrisë cilësinë e jetesës?! Kur ata kanë rrugë, gjelbërim, ujë të pijshëm. Por, Bashkia vijon se kjo rrugë do shërbejë edhe si rrugë lidhëse midis zonës së Teg dhe rrugës së Elbasanit nga njëra anë me një sërë rrugësh tretësore të tjera, komplekse banimi, shkolla dhe biznese.
