Familjarët e shqiptarit Saimir Sula, i cili humbi jetën në rrethana të çuditshme në spitalin del Mar të Barcelonës dhe u kthye në atdhe pa zemër, kanë protestuar para Gjykatës së Lartë të Barcelonës duke kërkuar hetim për rastin.
Me pankarta në duar, ata kërkuan drejtësi për djalin e tyre. Familjarët e viktimës Saimir Sula njëherësh kanë bërë publik në Spanjë një situatë që në Shqipëri tashmë ka vënë prokurorinë në gjurmët e një komploti të dyshuar për trafik organesh.
Motra e të ndjerit është shprehur se Gjyqtarja nuk ka pranuar të bëjë analizën e ADN-së për të zbuluar nëse zemra i përket vëllait të saj.
“Gjyqtarja nuk pranon të bëjë analizën e ADN-së që tregon nëse kjo zemër është apo jo e vëllait tim. Kemi dy vite që kërkojmë analizën e ADN-së të këtij organi, që teorikisht i përket Saimirit”, tha Majlina Sula.
Ajo i kërkoi Gjykatës së Barcelonës të vijojë procedurat dhe t’i përgjigjet letërporosisë së shtetit shqiptar. Letër-porosia e fundit është e datës 14 dhjetor.
Familjarët janë shprehur se nisur nga mosveprimi i kanaleve administrative dhe gjyqësore në Spanjë, prokuroria shqiptare është e detyruar të kërkojë ndërhyrjen e ambasadës spanjolle në Tiranë.
“Zinxhiri i kujdestarisë së kësaj zemre u prish, askush nuk na tha se e kishin mbajtur në Barcelonë”, tha i afërmi.
Familjarët gjithashtu tregojnë se pas një viti, kanë denoncuar rastin për trafik organesh, por institucionet iu përgjigjën duke i thënë se zemra është në një institut mjekësor në Barcelonë, shkruajnë mediat spanjolle.
“Por kjo zemër është e 22 prillit, ka vdekur më 9 maj, nuk mund të jetë e tij”, tha familjari. Çështja tashmë ka ngjallur interesim të madh nga televizioni, qeveria dhe drejtësia në Shqipëri, por ekzekutivi spanjoll hesht.
“Kam ftuar Pedro Sánchezin të flasë si i afërm i Saimir Sulës, ata më përgjigjen duke thënë se nuk do të më thërrasin të flas sepse nuk është qeveria që merret me këtë, që nëse gjyqtari vendos të mos vazhdojë, presidenti. nuk mund të bëjë asgjë”, tha motra e të ndjerit.
Ajo ka kontaktuar edhe ekipin e ministres së Drejtësisë, Pilar Llop, pa rezultate të mëtejshme.
