Të kesh Xhuliano Skukën në skuadër është padyshim një bonus i madh, por nga ana tjetër është një sfidë më vete ta mbash në ekip. Disa klube janë vendosur në radhë me synimin për t’ia marrë Partizanit lojtarin më të mirë të skuadrës.
Interesi për dibranin nuk ka munguar as në verë, por pas debutimit me Kombëtaren dhe garancisë së vazhdimësisë që 24-vjeçari ka dhënë, në tavolinën e Partizanit është ulur një klub mjaft prestigjioz. Bëhet fjalë për skuadrën e Serisë A, Hellas Verona.
Gjithçka ka nisur në ndeshjen derbi, ku në stadium është parë Dritan Dervishi, drejtuesi i skautëve në klubin e Hellas Veronës, i shoqëruar nga drejtori sportiv i italianëve.
Mësohet se pas ndeshjes ata kanë zhvilluar një takim me presidentin e Partizanit, Gazment Demi, të cilit i kanë bërë edhe ofertën e tyre për Xhuliano Skukën, me shifrat që mbeten ende një sekret.
Pas propozimit, presidenti Demi ka dhënë një refuzim me argumentin se Partizani po kërkon titullin dhe Skuka është shumë i rëndësishëm, por edhe nuk ka qenë shumë i bindur nga shifra e ofruar për “xhevahirin” e skuadrës së tij./Panoramasport
