Gjykata e Pogradecit vendosi sot masën e sigurisë “arrest në burg” për zyrtaren e AKSHI-t, Erisa Fero dhe 32-vjeçarin Likë Basha, e po ashtu për një 17-vjeçar, pasi së bashku u arrestuan si pjesë e një grupi që po realizonte trafikun e 58 kilogramëve kanabis nga Tirana për në Maqedoninë e Veriut.
Operacioni për arrestimin e tyre u realizua të mërkurën në mbrëmje dhe zyrtarja e AKSHI-t u arrestua së bashku me 2 të tjerët në zonën e Linit pranë Qafë Thanës.
Teksa tre të rinjtë do të qëndrojnë pas hekurave pa afat, Prokuroria vazhdon hetimet për rastin e trafikut të drogës dhe detaje të reja kanë dalë në pah për rolin e zyrtares 28-vjeçare.
Sa i përket Erisa Feros, ajo kishte transportuar nga Shkodra sasinë prej 58 kg kanabis të ndarë në pako.
Por sipas hetuesve kjo nuk ishte hera e parë që e reja kryente këtë aktivitet të paligjshëm, pasi ajo merrte përsipër transportimin e lëndës narkotike.
Për të kaluar postblloqet e policisë që mund të dilnin rrugës 28-vjeçarja përdorte dokumentin e saj të punës dhe efektivëve u prezantohej si punonjëse e shtetit, ndërsa ata e linin të lirë.
Zyrtarja e AKSHI-t prej kohësh ishte vënë nën vëzhgimin e hetuesve që po e ndiqnin në detaje aktivitetin e saj. Kjo derisa u ndalua në hyrje të Pogradecit së bashku me Bashën dhe 17-vjeçarin, të dy nga Fushë Kruja.
Sipas raportimit të mediave 28-vjeçarja kishte një post jo pak të rëndësishëm te AKSHI. Ky institucion deklaroi se ajo ishte një specialiste pranë sektorit të e-Albania, por mediat raportojnë se ajo ishte shefe kompjuterike ose në gjuhën e ekspertëve Head IT.
28-vjeçarja merrej me sektorin që ka akses në databaza të rëndësishme, si e-Albania, TIMS apo edhe në disa databaza si Doganat dhe Tatimet.
