Derbi i kryeqytetit i dhuron fitoren e parë Partizanit me Tiranën në “Air Albania” dhe njëkohësisht e shtyn skuadrën e Giovani Colellas të vetme në vendin e parë me 4 pikë me shumë.
Mjaftoi një gol i Skukës në minutën e 4 të ndeshjes pas një gabimi të Aleksit në mbrojtje për të vendosur fatet e një ndeshjeje që zgjati rreth 110 minuta për shkak të disa ndërprerjeve ku më e gjatë u regjistrua në të 47-ën me rreth 13 minuta për shkak të flakadanëve të hedhur në fushë nga tifozët bardheblu.
Momente paniku në stadiumin kryeqytetas pasi flakadanët u afruan shumë me pjesën e tribunës qëndrore ku ndodheshin edhe familje me fëmijë. Kryesori Eldorian Hamitaj i nxorri skuadrat nga fusha pasi nuk mund të flitej më për futboll.
Përsa i përket ndeshjes, Partizani kontrolloi me sukses të gjitha minutat deri në fund duke limituar në maksimum forcën goditëse të Tiranës ndërsa rrezikoi në të paktën tre raste për të gjetur golin e dytë me Carën. Fitore shumë e rëndësishme për Partizanin që e mbyll vitin në krye ndërsa Tirana merr një shuplakë të rëndë që mund të kompromentojë sezonin bardheblu.
