Afera e inceneratorëve është ajo që ka marrë vëmendjen dhe ka prodhuar debate të ashpra midis mazhorancës dhe opozitës në seancën parlamentare përmbyllëse për vitin 2022 që po zhvillohet prej mesditës në Kuvend.
Pas mbrojtjes që Edi Rama i bëri skemës që çoi 430 miliomnë euro në xhepat e Klodian Zotos dhe Mirel Mërtirit me firmën e tij dhe ministrave e kryebashkiakëve përkatës në Elbasan, Fier e Tiranës, lideri i opozitës Sali Berisha mori fjalën në foltore duke thënë se është kryeministri pronari dhe përfituesi direkt i koncesionit.
“Gjuhë ordineri. Argument i vetëm që nuk vjedh ka gjatësinë trupore. Në aferën 420 mln njeriu i parë kryesor ka emrin Rama. Nëse do të funksionojë në interesin tuaj e ka të thjeshtë, vetëm zbaton ligjin. Rama në aferën e inceneratorëve, pasi Ministri i Mjedisit i dërgoi shkresë agjencisë së prokurimeve për të diskutuar në lidhje me djegësat, Edmond Ahmeti i kthen përgjigje të prerë që kjo formë nuk ekziston në ligj. I dërgohet shkresa e dytë në nëntor Ahmeti kthen të njejtën përgjigje: “Negociatë e mbyllur nuk njihet në ligj”. Ja nis Kokës dhe Agaçit, përgjegjës direkt për ligjshmërinë e akteve të qeverisë. Por Edi Rama pavarësisht nga ky vendim i prokurimeve, firmos për kontratën me negociatë të mbyllur. Një kryeministër kurrë nuk e bënte këtë nëse s’do ishte kompania e tij”, tha Berisha.
Në vijim kreu i PD tha se e akuzon Ramën si personin kyç të kësaj skeme të vjedhjes së parave publike jo se është kundërshtari i tij politik, por sepse “Lefter Koka nuk kishte asnjë qindarkë në buxhetin e ministries”.
“S’mund të merrte asnjë qindarkë, buxheti votohet këtu, në buxhet ka një fond, i emergjencës rezerve i KM. Atë fond veç kryeministrit e ministrit të Financave s’e prek njeri. Rama e vuri në funksion të djegësit për të vjedhur fondin rezervë të Këshillit të Ministrave. Kur ndodh kjo? Kur sipërmarrja është e jotja. Pronarët e sipërmarrjes janë Rama i pari. Shkojmë më tutje! U morën paratë rezervë e u përdorën për tu vjedhur te inceneratorët. Kushtoi i pari 12 mln dhe u dhanë 21. Pasi u mor Elbasani do merrej Tirana që do ishte shumëfishe. Rama me Ahmetaj nëpërmjet Zotos, agjent e punonjës i tyre, bënë kërkesë të marrë bonus 8 përqind për djegësin e Tiranës. E bënë kërkesën në nëntor 2016. Qytetarë nuk është kjo një vjedhje? Ç’dokumente duhej të vërtetohet kjo? Më 7 dhjetor vendosim ti japim Integrated Energji bonusin 8 përqind kur ajo nuk ekzistonte askund”, deklaroi Berisha.
