Apeli i Durrësit ka gjobitur me 50 mijë lekë për zvarritje të procesit gjyqësor, përfaqësuesin ligjor të bosit turk të kriptomonedhave, Faruk Ozer.
Mungesa në sallën e gjyqit e avokatit Klodian Skënderaj ka shtyrë sërish gjyqin për shqyrtimin e vendimit të ekstradimit të Ozer.
Ndërkaq relatori i çështjes ka vendosur ta shtyjë seancën në datën 27.12.2022, ora 09:15. Po kështu u caktua avokat nga gjykata, kryesisht për mbrojtjen e shtetasit turk.
Më 17 nëntor, gjykata e rrethit gjyqësor Elbasan, pas shumë shtyrjesh të procesit, vendosi ekstradimin në Turqi të Ozerit. Ky vendim u ankimua pasi, sipas Ozer dhe mbrojtjes së tij, ekstradimi në Turqi rrezikon jetën e ish-bosit turk të kriptomonedhave Faruk Ozer.
Në fund të gushtit, Ozer u arrestua në Shqipëri për llogari të Turqisë ku akuzohet për veprat penale “Krijimi i organizatës kriminale” dhe “Mashtrimi me pasoja të rënda”. Ai u shpall në kërkim ndërkombëtar pasi akuzohet se u largua nga vendi me afro 2 miliardë dollarë të përfituara përmes mashtrimit të mijëra përdoruesve të platformës së tij të kriptovalutës.
