Nga Boldnews.al
Lefter Alla është një nga kryetarët e bashkive që është hetuar nga SPAK, por që doli i “pa lagur”. Më pas vijoi “punën”, teksa u përqendrua te tenderat, kryesisht për ujësjellësin në qytet të ri dhe të vjetër, por edhe te ribërja e sheshit kryesor. Të gjitha kanë “ngrënë” para publike, ndërsa Lefteri ka firmosur fituesin e një tjetër procedure tenderuese.
Bëhet fjalë ruajtjen e godinave shtetërore me roje private, procedurë e cila duhet të ishte fituar nga kompania shtetërore “Illyrian Guard”. Por jo, pasi paratë duhen shpërndarë dhe pikërisht këto kohë, pasi zgjedhjet po afrojnë. Sipas dokumenteve që disponon BoldNews.al, të tria firmat kanë dhënë të njëjtën ofertë, madje edhe me qindarka, duke ngritur hije të mëdha dyshimi se gjithçka ka qenë e paracaktuar. Por, Alla ka bërë një zgjidhje “alla Alla”, duke ndarë këtë shumë, që ishte plot 650 mijë euro, me “short”. Të gjithë e dinë si bëhen shortet në Shqipëri!
Por, le të analizojmë shifrat e këtij tenderi të pazakontë dhe të çuditshëm “alla Alla”. Në datën 9 dhjetor 2022, Bashkia e Bulqizës ka shpallur fituesin e një tenderi “i hapur mbi kufirin e lartë monetar”. Përshkrimi i kontratës ishte “shërbim sigurie për ruajtjen fizike të ndërtesave, aseteve, njerëzve dhe pronave të Bashkisë Bulqizë me roje private”, me një afat 48 muaj, me një fond 65,060,447.00 lekë.
Kriter i përzgjedhjes ishte oferta ekonomikisht më e favorshme, bazuar në çmim. “Njoftojmë se kanë qenë pjesëmarrës të procedurës së sipërcituar operatorët ekonomikë ‘KEVENJO’ me vlerë 65,055,352.71 lekë, ‘RES-O3’ me vlerë 65,055,352.71 lekë dhe ‘TREZHNJEVA’ me vlerë 65,055,352.71 lekë.
Pra, të tria firmat pjesëmarrëse kanë ofruar të njëjtën shumë, madje edhe të njëjta qindarka. Diferenca mes fondit dhe vlerës së akorduar nga të tria firmat është vetëm 5,094.29. Një shumë e papërfillshme, pasi në këtë mënyrë oferta ishte sa 99 % e fondit limit.
Por, duke qenë se të tria firmat kishin të njëjtën vlerë, si veproi Bashkia e Bulqizës?! “Komisioni i vlerësimit të ofertave pasi bëri vlerësimin arriti në konkluzionin se të tre operatorët ekonomikë kishin paraqitur ofertë të njëjtë. Nga ana e komisionit, më datë 06/12/2022 u beë njoftimi i të tre operatorëve ekonomikë për caktimin e datës dhe orës së hedhjes së shortit” thuhet në të njëjtin dokument.
Bashkia thotë se në datën 09.12.2022, në orën 10.00, anëtarët e KVO verifikuan dokumentat e identifikimit për 3 përfaqësuesit e kompanive të pranishme në këtë short. “U printuan 3 numra, nga 1 deri tek 3 për radhën e tërheqjes së fituesit. U printuan 3 letra, nga të cilat me mbishkrimin 2 humbës dhe 1 me mbishkrimin FITUES dhe u sqaruan që kompania që do tërheqi zarfin që ka fletën brenda me mbishkrimin FITUES do të jetë dhe fituesja e këtij shorti. Më pas iu kërkua përfaqësuesve të kompanive të dalin jashtë zyre dhe nga KVO u futën fletët ne zarfe përkatëse” thuhet në këtë dokument, shumë i pazakontë për një tender.
Sipas bashkisë, përfaqësuesit e kompanive u ftuan brenda dhe tërhoqën zarfin nga 1 deri tek 3. “Pasi u tërhoqën të gjithë zarfet ata tërhoqën sipas numërave deri sa rezultoj që zarfin me fletën fituese e kishte tërhequr operatori ekonomik ‘RES-03’” shkruhet në dokument. Pra, Lefter Alla hedh me short paratë e banorëve të varfër të Bulqizës, në një tender shumë të dyshimtë, i cili është bërë për të vetmin qëllim; vjeljen e çdo qindarke!
