Deputeti i Partisë Demokratike, kandidat i PD-së, për bashkinë e Tiranës në zgjedhjet e ardhshme lokale Belind Këlliçi, ka reaguar në lidhje me debatin për shembjen e pallatit në Kombinat, në kuadër të procesit të rindërtimit.
Ai ka lajmëruar se ka bërë kallëzim në SPAK për Erion Veliaj, Arbjan Mazniku, Maringlen Qato dhe për të gjithë personat që kanë përgjegjësi ligjore për ngjarjet në pallatin nr. 4, në rrugën “Myslym Keta”.
“Hapi i radhës.Kallëzim në SPAK për Erion Veliaj, Arbjan Mazniku, Maringlen Qato dhe për të gjithë personat që me veprimet dhe mosveprimet e tyre kanë përgjegjësi ligjore për ngjarjet në pallatin nr. 4, në rrugën “Myslym Keta”.Vazhdon!”, shkruan në FB, përkrahë shkresave deputeti.
Këlliçi po ashtu denoncoi në Çim Peka Live mbrëmjen e djeshme se një nga banorët e pallatit që pritet të shembet në Kombinat ka ndërruar jetë për shkak të situatës së shkaktuar atje.
Këlliçi tha se banori e ka përjetuar me dhimbje urdhrin për të lënë apartamentin.
“Para një ore jam vënë në dijeni nga banorët se shtetasi Agim Bozhiqi ka ndërruar jetë për shkak të kësaj situate dhe për shkak se ishte një nga banorët e pallatit. Mazniku apo kushdo tjetër nga bashkia e Tiranës, bëjnë mirë që familjes së të ndjerit t’i kërkojnë jo ndjesë publike, por t’i çojnë drita dhe ujë aktualisht që ta respektojnë mortin dhe të ndjerin që kanë në banesën e tyre”- ka thënë ai.
