Neritan Sejamini e sheh “betejën” mes Ramës dhe Kim për zgjedhjen e kreut të ri të SPAK, si një ngjarje mjaft qesharake, që ndër të tjera, ekspozon dështimin dhe kapjen e reformës në drejtësi.
I ftuar në emisionin “Të Paekspozuarit”, Sejamini tha se Kim ka edhe protagonizëm personal në këtë çështje. Analisti e konsideroi reformën në drejtësi një eksperiment dhe sistemin e sotëm të drejtësisë në Shqipëri, të pangjashëm me asnjë vend në botë.
“Nga deklarata e saj (ambasadores) i bie që po ta marri një person i caktuar SPAK, atëherë është i pavarur. Ne kuptojmë me këtë që SPAK jo vetëm nuk ka kurajo të nxjerrë para drejtësisë pushtetarët, por është i kapur.
Më vjen mirë që shoh ambasadoren që bën këtë deklaratë në publik. Një pjesë e asaj që bën ajo është lojë personale. Nëse do të ishte e DASH, takonte Ramën privatisht dhe e qepte gojën, ia linte Ramës pastaj.
Nuk mendoj se nëse zgjidhet njëri ose tjetri do të jetë ndonjë ndryshim. Zoti Dumani ka qenë aty dhe ka hetuar, nuk ka bërë ndonjë heroizëm.
Diskutimi që duhet të bëjmë, SPAK qenka i kapshëm dhe jo i pavarur. KLP gjithashtu, sepse ata e zgjedhin. Atëherë ne kemi nevojë për reformë të reformës në drejtësi.
Reforma ka mbaruar, kjo është reforma që ne kemi. Ne sot kemi drejtësi që ka probleme po aq sa kishte para kësa reforme. Duhet të reflektojmë çfarë është bërë gabim.
Drejtësi të pavarur dhe që nuk i jep askujt llogari nuk ka pasur dhe nuk mund të ketë. Drejtësia është një nga pushtetet që duhet të balancojë pushtetet e tjera. Drejtësia duhet ti japë llogari Kuvendit.
Si arrihet pavarësia e institucioneve? Vetëm nëse kemi ndarje dhe balancim të pushteteve. Ne kemi bërë një skandal. Sistemi i drejtësisë që kemi ngritur ne, është eksperiment në të gjithë botën. E kanë bërë disa burokratë.
Ambasadorja amerikane dhe çdo diplomat ka karrierën e vet dhe e ka të pamundur të kuptojë dhe të njohë në vend për tre vjet. Ky koncept që ata kuptojnë Shqipërinë dhe zgjidhin problemet e shqiptarëve, është koncepti ynë që duam të na zgjidhin problemet që tjerët, të na qeverisin të tjerët”, tha ndër të tjera Sejamini.
