Në letër duket një betejë mes Davidit dhe Goliathit, Francë-Marok duket një ndeshje pa shumë histori, në një kohë kur dy përfaqësueset kanë një diferencë shumë të madhe në traditë, prestigj dhe shifra, por në futboll nuk fiton gjithnjë më i forti në letër, këtë e ka vërtetuar më së miri Maroku.
Për herë të parë në histori një skuadër afrikane arrin në gjysmëfinalet e një Botërori dhe këtë e ka bërë me një futboll cilësorë, një skuadër blind, që ka pësuar vetëm një gol, autogol më saktë. Sigurisht Franca i ka armët e duhura për të thyer Marokun, Deschamps ka dy nga sulmuesit më të mirë të këtij Botërori, Mbappe-Zhiru, të dy së bashku kanë shënuar 9 gola.
“Si do tia bëjmë të thyejmë mbrojtjen e tyre? Do ta gjejmë një mënyrë. Ata kanë cilësi për tu mbrojtur mirë, por ata nuk dinë vetëm të shkatërrojnë, një ekip i tillë nuk do të shkonte dot në gjysmëfinale, por do jetë detyra jonë për t’i vendosur në vështirësi.
Nuk kam ndërmend të ndryshoj ekipin tim, dëshirojmë gjithnjë të kemi topin në kontroll, për të qenë të rrezikshëm. Ata gjithashtu do të kenë një mbështetje të madhe në stadium, por për fatin e mirë tifozët nuk shënojnë gola,” u shpreh ndër të tjera Didier Deschamps në konferencë për shtyp.
Në një kohë kur ndodhen në gjysmëfinale, Maroku nuk ka ndërmend të zgjohet, trajneri i tyre, Regragui beson realisht se mund të prekin finale e madhe: “Më pyetën nëse mund ta fitojmë Botërorin, iu përgjigja: Përse jo. Mund të ëndërrojmë, ëndrrat nuk kushtojnë asgjë. Ekipet evropiane janë mësuar të fitojnë Botërore, por ne jemi përballur me ekipe të mëdha, në këto nivele, nuk kemi hasur vështirësi. E sigurt është se çdo skuadër që përballet me ne duhet të ketë frikë”.
Nuk besojnë te mrekullia e radhës së Marokut kompanitë e basteve, pasi një fitore e mundshme e Francës vlerësohet me koeficientin 1,53.
