Ish-ministri i Drejtësisë, Aldo Bumçi ditën e sotme u paraqit në SPAK për të dhënë dëshminë e tij për çështjen “Gërdeci”.
Në dalje nga Prokuroria e Posaçme, Bumçu sqaroi për mediat se në shkresë nuk ishte shkrimi i tij por ishte falsifikuar duke përfshirë edhe emrin e ish-kryeministrit Sali Berisha para zgjedhjeve të vitit 2009.
Ish-ministri i Drejtësisë tregoi disa detaje nga mbledhjet e qeverisë, duke thënë se fillimisht vendimi i propozuar nga Ministria e Mbrojtjes për Gërdecin nuk është miratuar pasi ka pasur disa vërejtje nga ana e Ministrisë së Drejtësisë.
“Jam thirrur si person që kam dijeni kam qenë ministër drejtësie në kohën që janë miratuar VKM-të. Patjetër që pyetën, unë po them publikisht: qëndrimet e Ministrisë së Drejtësisë dhe të miat si ministër janë të dokumentura në qëndrimet publike që kemi mbajtur atë kohë. Vendimi i propozuar nga Ministrisë së Mbrojtjes nuk miratohet, vendosen kontakte mes dy ministrive që ato të merrnin parasysh vërejtejt ligjore që ato kishin. Kjo pasqyrohet në qëndrimin zyrtar që ne i dërgojmë Ministrisë së Mbrojtjes, që ne nuk kemi vërejtje.
Përgjigja e dërguar nga ne është me datë me numër protokollit, është e saktë. Pasi i kemi çuar qëndrimin tonë zyrtar, del një shkresë që ka një shënim në anë për zotin Shkëlzen Berisha. Kjo shkresë është e falsifikuar dhe nuk i qëndron asnjë testi logjik. Ministrisë së Mbrojtjes e kishte përgjigjen tonë para shkresës. Nëse unë kisha nevojë, që s’kishte as takim as kërkesë, të komunikoja me zotin Shkëlzen Berisha, nga Ministria e Mbrojtjes?
Shënimi në cepin e shkresës…ministri i Drejtësisë lë shënime në qindra shkresa dhe këto shënime të miat janë nga shkresa të ministrisë që unë kam shkruar. Ishte qartësisht një shkrim tjetër. Nuk ishte as imitim i shkrimit tim. Çështja u shqyrtua kur unë isha deputet i thjeshtë kam ndërmarrë dy akte. Si përgjegjësi politike kam rreshtuar faktet dhe kam bërë kallëzim penal në atë kohë dhe kam kërkuar të hetohet kaligrafia. Nuk ka dy shkrime njësoj, por e theksoj nuk ishte as imitim i shkrimit tim”, tha fillimisht Bumçi.
Po ashtu Bumçi tregon edhe korrespondencat që kanë pasur dy ministritë, ajo e Mbrojtjes dhe ajo e Drejtësisë, ndërsa thekson se shkresa me shënimin për Shkëlzen Berishën është e falsifikuar.
“Siç e ka ministria e Drejtësisë, e Mbrojtjes, e qeverisë përgjigja e dërguar nga ne nuk ka asnjë shënim të tillë. Kjo është me datë dhe numër protokolli. Vendimi është trajtuar në dy mbledhje dhe jo në një. Pasi i kemi çuar Ministria e Mbrojtjes qëndrimin tonë zyrtar se nuk kishim vërejtje, sepse ata i kishin marrë parasysh vërejtjet e një mbledhje më parë, del një shkresë që ka një shënim në anë për zotin Shkëlzen Berisha. Kjo shkresë është e falsifikuar dhe nuk i qëndron asnjë testi të thjeshtë logjik. Ministria e Mbrojtjes e kishte përgjigjen tonë disa ditë më parë sesa shkresa që kishte shënimin e Shkëlzen Berishës. Nuk kishte nevojë për një shkresë tjetër në Ministrinë e Mbrojtjes. Nëse unë do kisha nevojë të komunikojë me zotin Shkëlzen Berisha do e bëja këta me faks nga Ministria e Mbrojtjes, për ti thënë që çfarë? Që nuk kemi vërejtje. Këtë mund ta bësh me telefon, me mesazh, po ti nuk ke nevojë të çosh Fax në Ministrinë e Mbrojtjes për zotin Shkëlzen Berisha”, përfundoi Bumçi.
