“Stop Ballkanit të Hapur” është thirrja që ka kumbuar sot para Parlamentit të Malit të Zi, teksa qytetarë dhe deputetë të opozitës kundërshtojnë projektin, të cilit kryeministri në largim Dritan Abazoviç kishte tendencën t’i bashkohej kur u ftua nga nismëtarët Aleksandër Vuçiç dhe Edi Rama.
“Vijesti” raporton se në qendrën e Podgoricës ka bllokime të mëdha trafiku, pasi dhjetëra qytetarë janë mbledhur para godinës së parlamentit, ndërsa në urën “Gazela”, e njohur më mirë si “Ura e Varur” varën një pankartë ku shkruhej “Stop Ballkanit të Hapur”.
Në protestë marrin pjesë deputetët e Partisë Demokratike të Socialistëve (DPS) Predrag Sekuliç, Nikolla Janoviç, Mihailo Andushiç dhe zyrtarja e partisë Nermin Abdiç.
Pjesa më e madhe e politikanëve në Malin e Zi janë kundër idesë së aderimit të Malit të Zi në nismën e “Open Balkan”, e inicuar nga Shqipëria, Serbis dhe Masqedonia e Veriut, pas publikimit të raportit të një eurodeputeti i cili e cilësoi si të një nismë të dështuar dhe pa asnjë arritje.
Thirrjet kundër këtij projekti u dëgjuan edhe në një protestë masive të zhvilluar 3 javë më parë në Podgoricë, ndrsa është ende i paqartë qëndrimi i Abazoviç pas tubimeve nga qytetarët.
Sakaq, protestat në Mal të Zi po mbahen edhe për shkak të krizës politike që ka mbërthyer vendin, që pas rrëzimit nga një votëbesim ngelës i Qeverisë Abazoviç në gusht të këtij viti.
Opozita e udhëhequr nga partia e Milo Gjukanoviç po kërkon shpërndarjen e Parlamentit dhe organizimin e zgjedhjeve të jashtëzakonshme, por shumica parlamentare, e udhëhequr nga Fronti Demokratik pro-rus, po kërkon që të formohet një qeveri e re që të udhëhiqet nga Miodrad Llekiç, që ka mbështetjen e kësaj partie.
Mali i Zi po ashtu ka të bllokuar Gjykatën Kushtetuese, pasi që nga shtatori nuk ka kuorumin e nevojshëm për të marrë vendime dhe pa kuorumin e këtij institucioni nuk mund të shpallen rezultatet përfundimtare në rast të mbajtjes së zgjedhjeve.
