Një shpërthim i fuqishëm ka ndodhur në orët e para të mëngjesit në zonën e Komunës së Parisit në Tiranë.
Policia bën me dije se është hapur me forcë dera e një dyqani në pronësi të shtetasit Amarald Canaj, ndërsa policia dyshon se shkak mund të jetë një konflikt pronësie. Uniformat blu bëjnë me dije se një sasi kapsollë detonatore është vendosur pranë një biznesi, duke shkaktuar dëme materiale.
“Më datë 11.12.2022, rreth orës 09:30, Policia ka marrë njoftim se ishte hapur me forcë dera e një dyqani, në rrugën “Jusuf Vrioni”. Menjëherë pas njoftimit, në vendin e ngjarjes kanë shkuar shërbimet e Policisë dhe grupi hetimor. Nga veprimet paraprake dyshohet se dera e dyqanit në pronësi të shtetasit A. C. mund të jetë dëmtuar si pasojë e plasjes së një kapsolle detonatore, apo të ndonjë sasie të vogël lëndë plasëse”, njofton policia e Tiranës.
Janë sekuestruar kamerat e sigurisë në zonë për të zbuluar nëse është filmuar lëvizja e autorit. Grupi hetimor vijon punën për zbardhjen e rrethanave të ngjarjes dhe të shkakut të dëmtimit të derës.