Një plagosje me thikë që ka ndodhur në Pogradec është zbardhur nga policia, duke çuar pas hekurave tre persona.
Sipas Uniformave Blu janë arrestuar tre vëllezër, mbi të cilët rëndon vepra penale “Plagosje e rëndë me dashje” kryer në bashkëpunim. Ata akuzohen se kanë plagosur me thikë shtetasin E. H., 26 vjeç, pas një konflikti për motive të dobëta në lagjen Nr.2 të qytetit liqenor.
I plagosuri u dërgua në spitalin e Traumës në Tiranë, për mjekim më të specializuar dhe është jashtë rrezikut për jetën.
“Specialistët për Hetimin e Krimeve të Komisariatit të Policisë Pogradec arrestuan në flagrancë shtetasit R. O., 28 vjeç, R. O., 30 vjeç dhe Xh. O., 23 vjeç (vëllezër) banues në Pogradec, për veprën penale “Plagosja e rëndë me dashje”, kryer në bashkëpunim. Këta tre shtetas, mbrëmjen e djeshme, në një lokal, në lagjen nr. 2, Pogradec, gjatë një konflikti për motive të dobëta, dyshohet së kanë plagosur me mjet prerës (thikë) shtetasin E. H., 26 vjeç, banues në Pogradec, i cili u dërgua në spitalin e Traumës në Tiranë, për mjekim më të specializuar, aktualisht jashtë rrezikut për jetën”, njofton policia.
