Ish-drejtoresha e Divizionit Tregtar të OSHEE, Albana Ferraj, pasi u arrestua pas dy viteve të kaluara në arrati është lënë në burg nga Gjykata e Posaçme kundër Krimit dhe Korrupsionit.
GJKKO ka vendosur masën e sigurisë “arrest në burg” për ish-drejtoreshën, që ka qenë njëherësh edhe shefe e kabinetit të administratorit të OSHEE-së, Ardian Çela.
Ferraj u arrestua pak ditë më parë, pasi ishte shpallur në kërkim nga policia sepsse SPAK e akuzonte për korrupsion dhe marrje ryshfeti në vlerën 131 mijë euro.
Albana Ferraj akuzohet për favorizimin e një kompanie italiane në një tender të kaluar nga zyra e saj në vitin 2016.
“Ferraj e ka fshehur origjinën e shumës monetare që ka përfituar, edhe pse e dinte që ky veprim përbente vepër penale”, thuhet në kërkesën e SPAK, që e akuzon atë edhe për “pastrim të produkteve të veprës penale”.
