Kreu i Partisë së Lirisë, Ilir Meta ka komentuar në një intervistë televizive ngjarjet e fundit në politikën shqiptare, duke u ndalur veçanërisht te grushti i Gert Shehut ndaj kryedemokratit Sali Berisha, që e cilësoi një goditje për demokracinë dhe pluralizmin.
Ndër të tjera, aleati opozitar i PD iu përgjigj edhe pyetjes se kush do të jetë kryeministri i Shqipërisë në rast të fitorës së koalicionit të tyre në zgjedhjet e përgjithshme në vend.
“Çfarë do të ndodhë nëse opozita fiton zgjedhjet parlamentare në 2025? Kush do të vendoset kryeministër, Sali Berisha non grata, apo do të krijohet një mundësi për Ilir Metën?”, ishte pyetja së cilës Meta iu përgjigj duke thënë se do të pranonte çdo lloj pozicioni në rast fitore të pushtetit ekzekutiv.
“Këto janë histori që nuk kanë asnjë rëndësi për momentin? Për momentin? Po edhe në të ardhme nuk janë çështje kaq të rëndësishme. Për Ilir Metën ka një mision instalimi i referendumeve në Shqipëri siç e ka vendosur vetë populli shqiptar në kushtetutë dhe rivendosja e llogaridhënies në këtë vend në çdo nivel. Se ku do jetë ilir meta në të ardhmen, e kam thënë që në tre dekadat e ardhme do jem aktiv në politikë dhe nuk përjashtoj asnjë lloj pozicioni përveç atij të presidentit për mandatin e dytë se nuk mund të ndodhë në 20 vitet e ardhshme. Këto janë çështje që i vendos demokracia, i vendos vota. Nuk është kjo çështja kryesore që më intereson më shumë mua në jetën politike”, tha Meta.
