Kreu i Partisë Demokratike, Sali Berisha u shpreh se lëvizja studentore e dhjetorit ka qenë lëvizja më rëndësishme pas shpalljes së pavarësisë.
“Unë nuk injoroj kurrsesi luftën, por gjaku që u derdh për liri, për dinjitet, solli, se historinë duhet ta themi siç është, ne kaluam nga një pushtim në një pushtim tjetër, në një diktaturë që u kushtoi shqiptarëve më shumë se në çdo regjim mizor”, tha Berisha.
Sipas tij, shkëputja nga diktatura nëpërmjet kësaj lëvizjeje ishte e një rëndësie të jashtëzakonshme për Shqipërinë. Një grup studentësh dhe pedagogësh të Universitetit të Tiranës në vitin 1990 u bënë protagonistë të kthesës së madhe historike, protestave paqësore, të cilat sollën më pas rrëzimin e regjimit komunist që mbajti mbyllur shqiptarët për 5 dekada.
