Analisti amerikan David Phillips, njohës i çështjeve të Ballkanit dhe drejtor i Programit për Ndërtimin e Paqes dhe Drejtësisë në Institutin për Studimin e të Drejtave të Njeriut, ka dënuar sulmin fizik ndaj kreut të PD-së Sali Berisha gjatë protestës së opozitës në Bulevardin “Dëshmorët e Kombit”.
Në një reagim për Politiko.al. Phillips e komenton sulmin ndaj Berishës si një dëshmi të kalbëzimit të shoqërisë shqiptare nën udhëheqjen aktuale, të qeverisë Rama.
“Sulmi ndaj Dr Berishës dramatizon kalbëzimin e shoqërisë shqiptare nën udhëheqjen aktuale. Në vend që të adresonte mosmarrëveshjet përmes dialogut, një mbështetës i qeverisë iu drejtua dhunës”, shprehet analisti amerikan.
Analisti ngre dyshime nëse autori Gert Shehu veproi i vetëm apo nëse incidenti u frymëzua nga armiqësia e qeverisë ndaj PD-së.
“A veproi autori i vetëm? A u frymëzua nga armiqësia e qeverisë ndaj PD-së? A është bërë Shqipëria pa ligj, e kontrolluar nga gangsterët? Këto janë pyetje që duhet t’i drejtojë Edi Rama”, tha analisti.
