Ambasadori shqiptar në Londër, Qirjako Qirko thotë se disa shqiptarë që kalojnë ilegalisht drejt Mbretërisë së Bashkuar, shtiren si viktima të trafiqeve, vetëm që të përfitojnë azil.
Këto komente ambasadori shqiptar i bëri në Komitetin e ngritur për Çështjet e Brendshme në Mbretërinë e Bashkuar. Ai tha se shumë shqiptarë po mashtrohen nga reklamat në “Tik Tok” që i ftojnë ata të kalojnë ilegalisht në Mbretërinë e Bashkuar.
Sipas tij, trafikantët e njerëzve i ftojnë shqiptarët që të ndërmarrin udhëtimin, duke iu thënë se do të kenë mundësi për të ngritur biznese, pavarësisht se do kalojnë ilegalisht.
I pyetur nëse shqiptarët kishin mbërritur ilegalisht në Britaninë e Madhe për arsye ekonomike, Qirko tha: “Kam qenë në kontakt me disa njerëz që kërkojnë shërbimet e ambasadës sonë.
Dhe disa prej tyre shpjeguan se po, ne jemi viktima të TikTok dhe Facebook, ne kemi ardhur këtu sepse menduam se ishte e lehtë të fillonim një biznes.
“Dje po flisja me një zotëri nga jugu i Shqipërisë. Ai drejtonte një bar të vogël dhe më pas tha se pa në TikTok se kishte një mundësi për të hapur të njëjtin lloj biznesi në MB.
Por pas tre javësh kuptova se nuk ishte e mundur kështu që ai u kthye në Shqipëri.’
I pyetur nga kryetarja e komitetit Diana Johnson nëse shqiptarët po mbërrinin me gomone për arsye ekonomike, ai u përgjigj:
“Po, njerëzit po vijnë për të njëjtën arsye që italianët, francezët dhe gjermanët… për të kërkuar mundësi më të mira”.
Ai tha se shumë prej të ardhurve ishin të rinj, duke shtuar: “Njerëzit janë kthyer sepse e kuptojnë se Britania e Madhe nuk është parajsa që mendonin se ishte.
“Në përgjithësi ata janë të rinj që janë shumë të lehtë për t’u manipuluar bazuar në atë që shohin në mediat sociale. Realiteti kur ata mbërrijnë është ndryshe.”
Ka pasur një rritje dramatike të numrit të shqiptarëve që kalojnë Kanalin, dhe ata përbënin një të tretën e 44,000 që bënë udhëtimin nga janari në shtator të këtij viti.
Gjatë kësaj periudhe, gjithsej 3,432 shqiptarë pretenduan se ishin viktima të trafikimit të qenieve njerëzorem duke i bërë ata kombësinë më të madhe duke përdorur Aktin e Skllavërisë Moderne, me tre të katërtat e këtyre pretendimeve të ardhura nga të rriturit.
Sipas Daily Mail, zyrtarët e Mbretërisë së Bashkuar, duke përfshirë Agjencinë Kombëtare të Krimit, kanë ngritur vazhdimisht shqetësime se disa migrantë po shfrytëzojnë sistemin duke pretenduar në mënyrë të rreme se janë viktima të skllavërisë në mënyrë që të qëndrojnë në Mbretërinë e Bashkuar ndërkohë që pretendimet e tyre shqyrtohen.
Sekretarja e Brendshme Suella Braverman ka folur gjithashtu për shqetësimin e saj për shqiptarët që bëjnë pretendime ‘të rreme’ sipas Aktit të Skllavërisë Moderne.
I pyetur nga deputeti konservator Tim Loughton nëse do të ishte më mirë që emigrantët shqiptarë që pretendojnë se janë viktima të skllavërisë të ktheheshin nga Britania e Madhe, ambasadori tha, ‘po’, përpara se të mbështeste planet për një sistem për ekstradimin e shpejtë.
Gjatë seancës së sotme, Qirko u tha vazhdimisht deputetëve se qeveria e tij “nuk ka informacion” për një rritje të njerëzve nga shteti ballkanik që udhëtojnë drejt Britanisë së Madhe, duke pretenduar se detajet nuk janë dhënë nga Zyra e Brendshme.
Qirko hodhi poshtë një sugjerim që Shqipëria duhet të paguajë për strehimin e emigrantëve në Britani dhe refuzoi të komentojë një sugjerim që Mbretëria e Bashkuar duhet të refuzojë automatikisht të gjitha kërkesat për azil nga Shqipëria, sepse ‘nuk është problemi im’.
