Një ngjarje e rëndë ka ndodhur mbrëmjen e sotme në qytetin e Vlorës, ku pas një konflikti kanë mbetur të plagosur dy persona.
Sipas informacioneve paraprake mësohet se në spitalin e qytetit bregdetar kanë mbërritur të plagosur dy persona, babë e bir. Uniformat blu bëjnë me dije se gjatë një konflikti dhëndri i familjes shtetasi R.K, ka plagosur me thikë vjehrrin dhe kunatin e tij.
Bëhet fjalë për Xhevdet Braushin, 62 vjeç dhe djalin e tij Ablion Braushi. I ati është jashtë rrezikut për jetën ndërsa djali rreth 30 vjeç ndodhet në gjendje kritike për jetën.
Grupi hetimor ndodhet në vendngjarje dhe po punon për zbardhjen e plotë të rrethanave të ngjarjes, ndërkohë shërbimet e Policisë po kontrollojnë zonën me qëllim lokalizimin dhe kapjen e autorit të dyshuar.
Njoftimi i policisë Vlorë:
“Rreth orës 21:30, në lagjen “1 Maji”, dyshohet se pas një konflikti të çastit për motive të dobëta, shtetasi R. K., ka plagosur me mjet prerës thikë, vjehrrin dhe kunatin e tij, shtetasit Xh. B., rreth 60 vjeç dhe A. B., rreth 30 vjeç, të cilët ndodhen në spital, nën kujdesin e mjekëve.
Grupi hetimor ndodhet në vendngjarje dhe po punon për zbardhjen e plotë të rrethanave të ngjarjes. Shërbimet e Policisë po kontrollojnë zonën me qëllim lokalizimin dhe kapjen e autorit të dyshuar”.
