Primaret e Partisë Demokratike do të mbahen këtë të diel dhe do të nxjerrin kandidatët e kësaj force politike për zgjedhjet lokale të vitit 2023.
Në emisionin “Të Paekspozuarit” është diskutuar veçanërisht për primaret e Tiranës.
Ja si mendojnë analistët, për kandidatin që i duhet PD përballë Veliajt!
Enton Abilekaj: Unë mendoj se duhet të fitojë Ilir Alimehtmeti, është kandidati më i mirë që mund të zgjedhë PD dhe mund të krijojë atë koalicion që ka nevojë me shoqërinë. Shanset për të krijuar një koalicion, që edhe po nuk e mundi Veliajn, është koalicion që do të mbetet edhe për 2025. Do të jetë një shpresë për 2025.
Ergys Mërtiri: Për të maksimalizuar votat sa të jetë e mundur, më i avantazhuar është ai që mund të marrë elektorat gri. Shoh më të avantazhuar zotin Alimehmeti. Përse këta duan kandidat politik? Për mua kandidati jo politik e ka politikën brenda se ka partinë që do të punojë. Ata (Berisha dhe Meta) e duan kandidatin politik për pazare.
Neritan Sejamini: Në partitë politike, pas kaq vitesh, nuk e kuptojnë se cfarë është fushata zgjedhore. Ti del për të bindur njerëzit. Njerëzit më të rëndësishëm, janë ta pavendosurit, të lëkundurit. Duhet t’ju marrësh atyre votën me dashuri.
Në Shqipëri, këtu lavdërohet ai që e shan Ramën. Në parti politike kujtojnë se gara do jetë me grushta dhe fitorja vendoset me boks. Harrojnë, që do të dalin para njerzve dhe të kërkojnë votat. Njerëzit që janë të pavendosur mbi të gjitha.
Duhet një kandidat me pëlqyeshmëri publike, një kandidat të ndershëm, qytetar. Një kandidat me integritet. PD do të bëjë gafë, nëse e sheh garën zgjedhore si luftë me grushta dhe zgjedh njeri që ia përplas Veliajt. Garën e fiton ai që thotë do ti japim fund korrupsionit, etj.
