Sa larg mund të arrijë partia “America” e Elon Musk? Sipërmarrësi gjeni dhe i përfshirë në polemika të shumta ka lindur në Afrikën e Jugut dhe sipas Kushtetutës amerikane, nuk mund të kandidojë për president.
Por ai mund të kandidojë për një vend në Kongres. Për t’u kandiduar në Dhomën e Përfaqësuesve kërkohet të jesh qytetar amerikan për të paktën shtatë vjet; për Senatin duhen nëntë. Musk, 54 vjeç, ka marrë shtetësinë amerikane në vitin 2002, kështu që e plotëson këtë kusht prej kohësh.
Nëse është vërtet serioz, partia e tij mund të paraqesë kandidatë në zgjedhjet afatmesme të planifikuara për t’u zhvilluar më 3 nëntor 2026. Ka ende kohë dhe siç na ka mësuar përvoja e viteve të fundit, gjithçka mund të ndodhë. Gjithsesi, pas rreth një viti e gjysmë, do të votohet për të gjithë përbërjen e Dhomës së Përfaqësuesve (435 vende) dhe për një të tretën e Senatit (33 vende). Partia Republikane rrezikon të humbasë shumicën aktuale në të dyja dhomat e Kongresit dhe partia “America” mund të bëhet vendimtare për t’ua marrë konservatorëve primatin.
Në Dhomën e Përfaqësuesve, republikanët kanë aktualisht një avantazh prej tetë deputetësh (220 ndaj 212, me tre vende të lira); në Senat, diferenca është gjashtë senatorë (53 ndaj 47). Vetë Musk i ka përmendur qëllimet e tij.
“Mjafton të përqendrohemi te fitimi i dy ose tre vendeve në Senat dhe tetë deri në dhjetë vende në Dhomën e Përfaqësuesve” për t’u bërë faktori vendimtar në politikën amerikane. Kësisoj edhe për të detyruar Trump të negociojë për ligjet më të rëndësishme.
A është ky objektiv realist? A ka mjaftueshëm votues që ta bëjnë të realizueshëm? Musk ia shtroi këtë pyetje ndjekësve të tij në platformën X (ish-Twitter), ku ka 221 milionë ndjekës.
“A duhet të themelojmë ‘The American Party’?”.
Pyetjes iu përgjigjën 1 milion e 248 mijë e 856 persona. 65% thanë “po”, ndërsa 35% “jo”.
Musk publikoi edhe një manifest me shtatë pika.
Ja cilat janë:
- Ulja e borxhit dhe shpenzime të përgjegjshme;
- Modernizimi i ushtrisë me inteligjencë artificiale dhe robotikë;
- Politika pro-teknologji, përshpejtimi për të fituar garën për inteligjencën artificiale;
- Më pak rregullim shtetëror, sidomos në sektorin energjetik;
- Liria e fjalës;
- Politika për nxitjen e lindjeve;
- Qasje centriste për pjesën tjetër të temave.
Siç shihet, për momentin është më shumë një listë synimesh sesa një program i mirëfilltë qeverisës. Pika qendrore duket të jetë rreptësia fiskale, pikërisht aty ku ka ndodhur përplasja e fortë me Donald Trump.
Sipas një sondazhi të Universitetit Quinnipiac, plani i Trump për buxhetin, i quajtur “Big Beautiful Bill” (Ligji i Madhe dhe i Bukur) që uli taksat kryesisht për të ardhurat mbi 200 mijë dollarë në vit dhe uli fondet për ndihmën shëndetësore për shtresat në nevojë nuk pëlqehet nga 29% e amerikanëve. Edhe një e treta e votuesve republikanë janë të pakënaqur. Megjithatë, nuk dihet se sa janë të shqetësuar për rritjen e borxhit publik (në përputhje me kritikat e Musk), dhe sa mendojnë se shpenzimet publike janë prerë tepër shumë, jo tepër pak.
Në postimet e tij, pronari i Tesla dhe Starlink përmend edhe mundësinë për të tërhequr votues nga krahu qendror i demokratëve. Por kjo duket e vështirë. Krahu progresist është i përçarë për shumë çështje, por ka qenë unanim kundër propozimeve të Musk për shkurtimin e shpenzimeve publike gjatë kohës që ai drejtoi për pak kohë “Doge” Department of Government Efficiency (Departamenti për Eficencën e Qeverisë).
Gjithsesi, partia “America” do të kishte burime të mëdha financiare për të ndikuar në opinionin publik, edhe pse sfida është komplekse, si nga e djathta, ashtu edhe nga qendra (e majta nuk hyn fare në konsideratë).
Burimi: Corriere della Sera
