Inspektori i Lartë i Drejtësisë, ILD i kërkoi Këshillit të Lartë Gjyqësor fillimin e procedimit disiplinor ndaj gjyqtarit të Gjykatës së Rrethit Gjyqësor Kukës, Sami Ujkashi.
KLGJ zhvilloi të enjten më 1 Dhjetor mbledhjen plenare për caktimin e relatorit që do të shqyrtojë kërkesën e ILD-së.
Nga sa u deklarua në mbledhje, u mësua se ILD, veç fillimit të procedimit disiplinor për Ujkashin, ka propozuar që ndaj tij të vendoset si masë ndëshkuese pezullimi nga detyra për një periudhë dyvjeçare. Gjatë mbledhjes plenare nuk u bënë me dije arsyet për të cilat ILD ka kërkuar fillimin e procedimit disiplinor për gjyqtarin Ujkashi.
Raportohet se hetimi disiplinor ka filluar për shkelje të legjislacionit material, shkelje disiplinore me dashje si dhe cënim të imazhit të magjistratit dhe të besimit tek sistemi i drejtësisë. Hetimi disiplinor është bazuar në një vendimarrje për ulje dënimi dhe lirim në kundërshtim me ligjin për një person që ishte dënuar me 15 vjet burgim, si dhe për moszbatim të legjislacionit në dy raste ekstradimi.
Pasi u hodh shorti, Ridvan Hado u zgjodh si relator i kësaj çështje. KLGJ bëri me dije se në vijim do të njoftojë mbledhjen e radhës kur do të shqyrtohet kërkesa e ILD-së për gjyqtarin Sami Ujkashi.
/Reporter.al/
