Anëtari i Kryesisë së PD, Florjon Mima, komentoi në emisionin ‘Çim Peka Live’ në Syri Tv përmbytjet në vend pas reshjeve të dendura të shiut në dy ditët e fundit dhe abuzimet e qeverisë në sektorin energjetik.
Florjon Mima tha se falë korrupsionit, keqmenaxhimit, papërgjegjshmërisë dhe amatorizmit të qeverisë, sot jemi në një situatë pothuajse dramatike.
“Nëse përpiqemi të bashkojmë copëzat e ngjarjes në një rrafsh linear, pak a shumë në këndvështrimin tim ne si opozitë kemi ngulur këmbë vazhdimisht që qeveria s’duhet të blejë energji sot për sot. Sa herë e ke lakun në fyt do blesh me çmim të lartë në bursë. Administratat e përgjegjshme, qeveritë e përgjegjshme, parashikojnë, prognozojnë, heqin mënjanë paratë, dhe blejnë për tre muaj, kohë të shkurtër. Kur e di se ke një sistem të alertimit, sistem prej 1.5 mln eurosh të ngritura me para publike. Kishin alertin që do fillonin reshjet, më datë 16-17-18-19 duhet të ishin zbrazur basenet. Kjo e shpjegon pse jemi në këtë situatë”, tha Mima.
Ai foli dhe për anijet e prodhimit të energjisë të vendosura në Triport të Vlorës.
“Dy anijet që po prodhojnë energji në Vlorë janë një kosto e stërmadhe për arkën tonë të përbashkët. Qira, lëndë e parë HFO, një lloj mazuti me shumë karbon brenda, kosto totale e tyre është 350-360 mln euro dhe dikush duhet ta paguajë. Këto janë para që do të dalin direkt nga arka e KESH, që do t’i marrë nga buxheti i shtetit, ose me garanci sovrane”, tha ai.
