Demokrati Gjin Gjoni ka paraqitur në Komisionin për Çështjet Ligjore dhe Administratën Publike kërkesën për shkarkimin e Presidentit të Republikës, Bajram Begaj, duke e akuzuar për “shkelje të vazhdueshme dhe të rënda të Kushtetutës”.
Sipas tij, veprimet e Presidentit nuk kanë pasur qëllim legjitim, por janë ndërmarrë për të shërbyer interesave të qeverisë, duke ndikuar negativisht në funksionimin e institucioneve dhe proceset demokratike.
Gjoni ka ngritur gjithashtu pretendime se Presidenti Begaj është i punësuar në një spital privat, ndërsa djali i tij punon në një kompani sigurimesh private.
Në dokument, Gjoni rendit shtatë shkelje të pretenduara:
Dekretimi i zgjedhjeve të pjesshme për Bashkinë e Tiranës në shkelje të Kushtetutës.
Ndërhyrja në mandatin e anëtarëve të Gjykatës Kushtetuese, duke prekur pavarësinë e saj.
Dekretimi në shkelje të ligjit për Komisionet Hetimore.
Dekretimi i ministrës virtuale ‘Diella’.
Mosndalimi i trupës diplomatike nga përfshirja në fushatën zgjedhore të vitit 2025.
Ndërhyrje e kabinetit të tij në administrimin e zgjedhjeve.
Punohet fiktivisht i biri i Presidentit në një kompani sigurimesh që përfiton tendera nga presidenca; vetë Begaj është i punësuar në një klinikë private.
