Vetëm disa minuta shi i janë dashur Tiranës që të “zgjohet” e përmbytur ndërsa rrugët nën pushtetin e ujit kanë “paralizuar” qarkullimin e automjeteve në disa zona të kryeqytetit.
Nënkalimi pranë Kopshtit Zoologjik kalohet me vështirësi për shkak të ujit që ka vërshuar në rrugë. Gjithashtu një tjetër zonë problematike është edhe rruga në “Don Bosco” si dhe disa akse të tjera.
Kjo situatë kaotike në kryeqytet shkaktohet gjithmonë kur ka reshje shiu për shkak të bllokimi të kanalizimeve dhe ndërtimeve në çdo cep të Tiranës.
Ministri i Mbrojtjes Niko Peleshi ka njoftuar se reshjet pritet të vijojnë gjatë ditës duke rrezikuar daljen e lumenjve të vegjël në disa zona. Ai i ka bërë thirrje drejtuesve të pushtetit vendor të marrin masat për t’i paraprirë situatës.
- Ministria e Mbrojtjes ngriti alarmin, ja çfarë paralajmëron në 5 qarqe:
Ministria e Mbrojtjes ka dalë me një njoftim në orët e para të mëngjesit të sotëm ku bën të ditur se pesë qarqe të vendit mund të rrezikojnë përmbytjet. Kjo për shkak të motit të keq që ka përfshirë vendin prej disa ditësh. Në qarqet Shkodër, Lezhë, Kukës, Vlorë dhe Gjirokastër, pritet të ketë reshje intensive të cilat mund të sjellin vërshime të përrenjve dhe lumenjve të vegjël dhe përmbytje në zonat urbane.
“Duke marrë në analizë modelet e fundit të hartave meteorologjike, pritet që mbi vendin tonë në orët në vijim në qarqet Shkodër, Lezhë, Kukës, Vlorë dhe Gjirokastër, të ketë reshje intensive të cilat mund të sjellin vërshime të përrenjve dhe lumenjve të vegjël dhe përmbytje në zonat urbane.
Ministria e Mbrojtjes dhe Agjencia e Mbrojtjes Civile i bën thirrje pushtetit vendor të marrë masat e nevojshme për t’u paraprirë përmbytjeve apo rrëshqitjeve të dherave.
Ne do të jemi në monitorim të vazhdueshëm të të gjitha situatave që mund të krijohen, duke garantuar ndihmë të menjëhershme në çdo rast emergjence”, thuhet në njoftimin e Ministrisë.
- Ndalohet lundrimi i anijeve të peshkimit në Vlorë
Kapiteneria e Vlorës ka ndaluar daljen në det të të gjitha mjeteve të vogla lundruese dhe të anijeve të peshkimit jashtë Gjirit të Vlorës në datat 19, 20, 21 dhe 22 nëntor për shkak të motit në përkeqësim.
Në njoftim flitet për “situatë hidrometeorologjike të përkeqësuar në gjirin e Vlorës dhe jashtë saj për datat 19-22 nëntor 2022, duke filluar nga ora 12:00 e datës 19 nëntor, në drejtimin jug- juglindje në forcën 5-6bft, 1.20-1.80 m brenda gjirit të Vlorës dhe jashtë gjirit të Vlorës në forcën 6-7bft deri 8bft me 15-25m/s dhe lartësi dallge nga 1.80 deri 3.50 metra.”
Po ashtu, është ndaluar dhënia e lejes së nisjes për të gjitha mjetet e vogla lundruese, anijet e peshkimit që operojnë jashtë gjirit të Vlorës dhe marrjen e masave për sigurimin e tyre.
- Stuhia rrëzon pemët, rrëshqitje gurësh dhe dherash në akset nacionale dhe rurale
Prej mbrëmjes së djeshme moti i keq me rrebeshe shiu dhe stuhi ka përfshirë vendin tonë.
Era e fortë kanë sjellë probleme gjatë natës në zonën Dukat-Fushë. Pemët e mëdha janë rrëzuar si pasojë e erës së fortë dhe kanë sjellë probleme në qarkullim. Raportohet se forcat zjarrfikëse kanë shkuar në vendin e ngjarjes për të bërë të mundur hapjen e rrugës dhe qarkullimin normal.
Kukësi është gjithashtu një ndër qytetet problematike pasi është përfshirë nga reshje të dendura shiu, intensiteti i tyre pritet të shtohet edhe më shumë gjatë mesditës sipas meterologëve. Ka prezencë të rënies së gurëve dhe dherave në akset nacionale dhe ato rurale, veçanërisht akset problematike janë ato të Kukës-Peshkopi, Kukës-Shishtavec, Kukës-Qaf Mali por edhe ato Krumë-Kamë-Bajram Curri e Qaf Morinë-Fierzë.
Probleme ka edhe te ujëmbledhësat vaditës në Has e Tropojë nga mbi fryrja.
