Nga Boldnews.al
Kompania “Gjoka” është një nga përfituesit më të mëdhenj të fondeve publike, kompani e cila ka fituar tendera të shumtë. Madje, është “ndihmuar” me ç’të mundet edhe për koncesionin e rrugës së Arbrit. Pikërisht në zonën e Dibrës, kësaj herë në Bulqizë, “Gjoka” ka fituar një tender të majmë plot 2 milionë euro. Por, me procedura tepër të dyshimta, ku është futur në “lojë” një nga kryebashkiakët më të përfolur në Shqipëri, Lefter Alla, për të cilin ka pasur procedime të hapura edhe në SPAK, për përdorim të lëndëve narkotike. Megjithatë, më shqetësuese është “përdorimi” i parave publike, ato që vijnë “nga lart” dhe taksat e banorëve tepër të varfër të Bulqizës.
Një paradoks i madh në Bulqizë, ku përfitues janë vetëm drejtuesit dhe kompanitë që bëjnë punë publike apo shfrytëzojnë me ç’të mundin nëntokën e asaj zone. Madje, me kosto të larta njerëzore, ku në atë vend janë me qindra viktima.
Megjithatë, asgjë s’e pengon Lefter Allën, i cili vijon i qetë detyrën, ndoshta duket e ditur se këto mund të jenë muajt e fundit në atë detyrë. Sipas dokumenteve që disponon BoldNews.al, Bashkia e Bulqizës ka finalizuar ditët e fundit tenderin me objekt “ndërtim sistem kanalizimesh dhe impiant të ujërave të ndotura në qytetin Bulqizë, Lagja e Re”. Në tender kanë marrë pjesë shumë kompani, ku oferta më e ulët ka qenë ajo e “Alko Impex” me një vlerë 193.879.656 lekë pa TVSH.
Por, lexoni se ccfarë bën Lefteri! Ai shpall fitues kompaninë “GJOKA KONSTRUKSION”, e cila ka pasur një vlerë rreth 199.991.881 lekë, pra dukshëm më të lartë Kjo ofertë kap vlerën e 2 milionë eurove. Bashkia ka fitur mekanizmat e “përjashtimit”, duke i gjetur një mori parregullsish kompanisë “Alko Impex”, edhe ajo një firmë “peshkaqene” e tenderëve, me lidhje të forta politike.
Megjithatë, duke qenë se në qarkun e Dibrës është e deleguar Belinda Balluku, ministrja e Infrastrukturës, e cila njihet si “bashkëpunëtore” e firmës “Gjoka”, s’kishte si të ndodhte ndryshe edhe me këtë tender, ku Alla i ka bërë nderet e fundit. Në fakt, për “Gjokën” kjo është një “rrugë e dy punë”, pasi po kryen punimet e “Rrugës së Arbrit”, kostot e së cilës janë rritur së tepërmi, edhe ato me procedura të dyshimta.
Në dokumentin e tenderit, Bashkia e Bulqizës ka shkruar se e s’kualifikon firmën “Alko” për shkak se “s’ka përvojë të suksesshme në zbatimin e ndërtimit”. Nuk ka punë të ngjashme, s’ka drejtues Teknik apo disa punëtorë rezultojnë të dypunësuar. Sipas saj, “Alko” ka marrë “borxh” një manovrator te firma “Geci” dhe një shofer te firma “Fusha”.
