Nga Boldnews.al
Prej të paktën pesë ditësh, banorët e Divjakës janë ngritur në protestë dhe kundërshtojnë vendosjen e një trau, i cili i detyron të paguajnë një tarifë 50 lekë për hyrjen në Parkun kombëtar, e cila është edhe rruga drejt bregdetit të Adriatikut.
Gjatë ditëve të fundit, Agjencia Rajonale e Mbrojtjes së Mjedisit ka vendosur infrastrukturën për ndërtimin e traut dhe zyrës së pagesës së tarifave, në mes të rrugës së Parkut.
Kjo infrastrukturë është dëmtuar nga banorët protestues, të cilët vijojnë të qëndrojnë të bindur se vendimi për traun e pagesës është kundër interesave të tyre dhe të të gjithë lokalitetit.
Ministria e Turizmit reagoi pas protestave të qytetarëve, duke deklaruar se vendosja e traut dhe tarifës është në shërbim të mirëmbajtjes së parkut.
“Boldnews.al” siguroi vendimin që nxiti revoltën e qytetarëve. Trau i pagesës po ndërtohet në bazë të një vendimi të miratuar në qendër të Tiranës, në selinë e kryeministrisë, në fund të Dhjetorit 2020.
Dhe, për ironi të fatit, vendimi për tarifat në parqet kombëtare është nënshkruar nga zv.kryeministri i asaj kohe, Erion Braçe, i cili sot reagon në rrjetet sociale në mbrojtje të protestës së banorëve.
Në vendimin nr. 1156, datë 24.12.2020 “Për përcaktimin e të ardhurave të gjeneruara nga tarifat që paguhen në zonat e mbrojtura, të masës dhe kritereve të përdorimit të tyre”, Këshilli i Ministrave parashikon ndër të tjera edhe tarifat për hyrjen në parqet kombëtare.
Në atë vendim thuhet se në parqe kombëtare, ku përfshihet edhe Divjaka, hyrja për qytetarët në këmbë apo me biçikleta, tarifa është 50 lekë.
Kjo shumë rritet, në bazë të mjetit të transportit që do të hyjë në këto zona.
“Mjete të çfarëdolloj me kapacitet deri në 5persona150 lekë/ditë/mjeti; Mjete të çfarëdolloj me kapacitet 6 deri në 10 persona200 lekë/ditë/mjeti; Mjete të çfarëdolloji me kapacitet 11 deri në 20persona250 lekë/ditë/mjeti; Mjete të çfarëdolloj me kapacitet 21 deri në 50 persona, 300 lekë/ditë/mjeti…”, thuhet në vendimin e Këshillit të Ministrave, të nënshkruar nga Erion Braçe, në mungesë të kryeministrit.
Megjithatë, Braçe aktualisht ka një qëndrim sqarues për traun e pagesës së Divjakës.
“Vendosja e një trau me pagesë është e paligjshme. Në territorin e bashkisë Divjakë ka disa rrugë Kombëtare. Nuk ka rrugë tjetër që të nxjerr në bregdet. Nga Velipoja deri në Sarandë, për të shkuar tek deti nuk paguhet asnjë qindrarkë. Kjo që bën Ministria në bashkëpunim me ARRSH është vendosja e një takse për të kaluar në rrugë dhe për të shkuar në det. është një pozicion që cënon edhe sigurinë rrugore”, thotë Braçe.
Në gjykimin e tij, “vendosja e pagesës në një aks kombëtar është e paligjshme. Unë do të ndërmarr çdolloj nisme për të goditur këtë paligjshmëri. S’kam asnjë komunikim me Ministrinë e Mjedisit. Nga ajo ministri buron e gjithë ajo arrogancë. Zyrtarët e Bashkisë Divjakë janë kërcënuar se do “fluturojnë” nëse pengojnë vendosjen e traut. Bashkia e ka pezulluar vendosjen e traut. Për vendosjen e kioskës duhet marrë leje nga Bashkia e Divjakës”.
