Agjencia Kombëtare e Shoqërisë së Informacionit (AKSHI) është një nga institucionet qeveritare që kohëve të fundit është vënë në qendër të akuzave të opozitës, por edhe denoncimeve në media për shkak të tenderimit të miliona eurove, në një kohë që të gjitha sistemet elektronike të vendit “u çmontuan” nga sulmi kibernetik iranian.
Por, gjatë kësaj jave AKSHI prokurori një tjetër tender me vlerë të madhe, rreth 8 milionë euro për “blerjen e SMS-ve”.
BoldNews.al falë dokumenteve që dispononte lidhur me procedurën e tenderit, në një artikull të publikuar dy ditë më parë i drejtoi Agjencisë Kombëtare të Shoqërisë së Informacionit 4 pyetje që do të ndihmonin publikun për të kuptuar bazën ligjore mbi të cilën ky institucion kërkon “blerjen e SMS-ve”.
Një përgjigje për këto pyetje gjithashtu do të ndihmonte për të kuptuar qëllimin për të cilin SMS-të do të përdoren, pasi hijet e dyshimit qëndrojnë teksa jemi në prag të fushatës elektorale për zgjedhjet lokale të 14 Majit.
Ashtu siç e edhe kishte paralajmëruar se do të botonte përgjigjen e AKSHI-t, BoldNews.al informon publikun se sipas një komunikate për shtyp të institucionit, tenderi për “Blerjen e SMS-ve” është prokuruar pasi përdorimi i tyre “është pjesë e masave të sigurisë kibernetike që lidhen me sistemin e-Albania”.
Institucioni sqaron se “në mënyrë që qytetarët dhe bizneset të përfitojnë shërbime elektronike në portalin e-Albania, është e detyrueshme kryerja e regjistrimit të llogarisë në portal dhe kjo procedurë përfundohet me sukses vetëm pasi përdoruesi të ketë marrë nëpërmjet një SMS-je kodin me një përdorim për konfirmimin e regjistrimit të llogarisë”.
“Edhe procedura e rivendosjes së një fjalëkalimi të ri është e lidhur ngushtësisht me dërgimin me SMS të kodit një përdorimesh në fund të verifikimeve përkatëse dhe dhënies së mundësisë së ndryshimit të tij. Në të njëjtën mënyrë funksionon edhe për Platformën e Nënshkrimit Elektronik. Ky shërbim është po aq i rëndësishëm edhe në rastin e aplikimeve të dërguara nëpërmjet e-Albania, pasi institucioni ofrues i shërbimit, njofton lidhur me statuset e ndërmjetme deri në lëvrimin e shërbimit. Për më tepër, sa herë që nëpunësi publik ose biznesi nënshkruan elektronikisht dokumente në formatin “.pdf” nëpërmjet platformës, si dhe në të gjitha sistemet informatike ku është integruar teknologjia e nënshkrimit elektronik remote (psh. sistemi e-kontrata, sistemi i recetës elektronike e-Rx, lejet e ndërtimit, etj). Njoftimet nëpërmjet shërbimit të SMS-ve përdoren edhe për të gjithë entitetet publike dhe subjektet private në momentin e parë që këto të fundit pajisen me certifikatën elektronike”, nënvizohet më tej në njoftimin për shtyp.
Sipas AKSHI-t, çdo ditë nga këto shërbime për realizimin e proceseve në e-Albania konsumohen mbi 100’000 SMS dhe thelbi i përdorimit të këtij shërbimi për përcjelljen e një kodi autentifikimi apo mesazhi njoftimi është pjesë jetike e sigurisë kibernetike.
