Nga Boldnews.al
Agjencia Kombëtare e Shoqërisë së Informacionit (AKSHI) është vënë nën akuzë kohët e fundit për një mori tenderash, me vlerë qindra milionë euro. Por, pavarësisht se janë hedhur një “lumë” me para’, sërish vendi ynë ra pre e sulmeve kibernetike, aq sa sistemi “e-Albania” nuk funksionoi prej disa javësh. Dhe, janë dashur sërish miliona të tjera, që ky sistem të vihej në funksion. Pas sulmeve, AKSHI tenderon çdo javë disa tendera me vlerë miliona euro për përmirësime apo shërbime të tjera.
Ndërkohë, javët e ardhshme sipas dokumenteve që disponon BoldNews.al, drejtoresha e AKSHI-t, Mirlinda Karçanaj, do të prokurojë një tender me vlerë të madhe. Bëhet fjalë për tenderin për blerje SMS-ve! Por, për çfarë duhen këto SMS, kujt do t’i dërgohen?!
Sipas dokumenteve që disponon redaksia jonë, Agjencia Kombëtare e Shoqërisë së Informacionit do të hapë një tender me objekt “blerje e ofrimit të shërbimit të SMS-ve për AKSHI”. Fondi limit i kësaj procedure është plot 808.080.000 lekë ose me TVSH rreth 8 milionë euro. Një shumë e majme, ndërsa në dokumente shkruhet se procedura do të bëhet në javët në vijim.
BoldNews.al shlfetoi dhe kërkoi se në çfarë baze ligjore apo rregullore AKSHI kërkonte blerje të SMS-ve. Por, në asnjë rast, nuk konstatuam asnjë dokument për “blerje SMS-ve”. I vetmi rast, nëse quhet, ishte vendimi i vitit 2017 “për riorganizimin e Agjencisë Kombëtare të Shoqërisë së Informacionit”. Në njërën nga pikat shkruhej se “Drejtoria e Përgjithshme e Standardizimit kë një sistemi të menaxhimi të standardeve (SMS)”. Por, asnjë fjalë më tepër se ku apo kur përdoren këto SMS.
Në mungesë të një informacioni të tillë, BoldNeës.al po e pyet publikisht AKSHI-n;
1. Për çfarë do t’i përdorë SMS-të?!
2. A kanë lidhje me fushatën apo edhe me zgjedhjet vendore?
3. Kujt do t’i dërgohen këto SMS dhe a nuk mund të përdoren metoda të tjera?
4. Sa SMS do dërgohen dhe si u llogarit shuma 8 milionë euro?
(Ps. Nëse AKSHI na kthen përgjigje publike, redaksia e BoldNeës.al do të botojë këto përgjigje).
