Pasi drejtuesja e seancës, Ermonela Felaj i ndërpreu fjalën, kryetari i Partisë Demokratike Sali Berisha ka gjetur zgjidhjen e menjëhershme për të komunikuar.
Berisha u fut ‘live’ në “Facebook” duke deklaruar se opozita është në parlament për të mbrojtur të drejtat e shqiptarëve.
“ Jemi sot këtu për të mbrojtur të drejtat e popullit opozitar, për të mbrojtur të drejtat e shqiptarëve. Këta këtu sot diskutojnë për Europën, përjashtojnë nga fjalimi ish-ministrin e Jashtëm. Këta sot diskutojnë për Europën me hijen e tmerrshme të vjedhjeve që kanë bërë me djegësit dhe atë që po përgatisin me Portin e Durrësit. Këta vetëm me Europën që nuk ka asgjë. Sot Taulant Sharra që është de fakto Gentian Sharra me kryebanditin me të cilin ka tendera dhe afera më të pista flet në emër të vasalit të Putinit lidhur me rubla ruse dhe përralla babushkash. Fikeni sa të duash mikrofonin ja që ekziston mrekullia e Facebook-ut, unë ftoj të mos kini frikë nga parlamenti, ja iku zonja Xhaçka, ministrja me investime strategjike”, është shprehur Berisha.
Menjëherë pasi fjalës së Berishës, ka vijuar deputeti Belind Këlliçi. Ky i fundit tha se kjo formë u zgjodh pasi drejtuesja e seancës nuk u dha fjalën.
“Nëse ne po gënjejnë, nëse po i biem në qafë minsttres, të vij vetë në debat të hapur të bëjë transparencë për publikun dhe t’u provojë qytetarëve shqiptarë që deputetët e opozitës po gënjejnë. Sot jemi njohur me procesverbalin e seancës së kaluar ku kemi parë atë debat të një niveli bandidesk, ku Edi Ramën e kanë zili të gjithë të burgosurit. Ne jemi te vendi i krimit, ku Edi Rama fyen opozitën, deputetët. Sot dy deputetë të opozitës janë të përjashtuar për 10 ditë vetëm se i janë përgjigjur akuzave dhe fyerjeve të Edi Ramës. Sot kemi një opozitë të vërtetë në mbrojtje të interesit të qytetarëve. Drejtuese e seancës mund të vazhdosh seancën normalisht duke i dhënë fjalën të gjithë deputetëve që kanë kërkuar fjalën. Nuk na dhe të drejtën as për procedurë”, tha Këlliçi.
Situata e tensionuar u krijua pasi deputetë të opozitës shprehën mosdakordësinë e tyre për kohën që iu ishte lënë në dispozicion për të folur.
