Kreu i Partisë së Lirisë u shpreh këtë të Martë se projekti i qeverisë për Portin e Durrësit është një skemë e pastër pastrimi parash.
Ai tha se synohet një biznes ndërtimi apartamentesh duke grabitur pronën më strategjike të Shqipërisë.
Në një deklaratë për mediat nga selia e PL-së, Meta u shpreh se është koha që drejtësia të veprojë sa më parë dhe u zotua se “ne do ti shkojmë deri në fund” kësaj çështjeje.
“Projekti nuk është një projekt strategjik por është thjesht një projekt ndërtimi pallatesh dhe apartamentesh, pasi në fund të të gjithë këtij projekti, rezultojnë të ndërtuara vetëm dy hotele me 800 shtretër dhe një marinë e vogël me 280 vende parkimi. Do të falen qindra milionë euro taksa, do t falen 820 mijë metra katrorë me një vlerë edhe kjo qindra milionë euro, është parashikuar edhe fond për shpronësime të tjera dhe e gjithë kjo, do të bëhet për të ndërtuar apartamente. Përjashtimi nga taksat është një shkelje flagrante e Kushtetutës, pasi trajton në mënyrë të diferencuar bizneset e një kategorie, pra në Durrës, kompanitë e ndërtimit të zakonshme do të paguajnë 7% taksë (4% për Taksën e Ndikimit në Infrastrukturë dhe 3% Taksa e Strehimit Social), ndërsa apartamentet e Edi Ramës do të përjashtohen nga kjo taksë…”, tha Meta.
“Projekti – pastrim parash”
Ashtu siç del e qartë nga Plani i Financimit të Projektit, shtoi, “është e qartë se kemi të bëjmë me një skemë të pastrimit të parave, sepse vetëm 6.8% e investimit prej 2 miliardë Euro, do të financohen përkatësisht: 3.4% nga aksionerët dhe 3.4% nga Bankat”.
Pra, rreth 130 milionë euro, llogariti kreu i PL-së.
Ndërsa pjesa tjetër, shtoi, 93.2% do të jetë me vetë-financim, pra prit të shiten apartamentet që investimi të vazhdojë.
Ai solli në vëmendje dhe paralajmërimet e Bashkimit Europian lidhur me “pasaportat e arta”, nismë që qeveria kërkon ta rikthejë me projektin e Portit të Durrësit.
“Megjithëse Bashkimi Europian ka qenë i qartë dhe i prerë lidhur me pasaportat e Arta, për të cilat rrezikohet seriozisht lëvizja e qytetarëve shqiptarë në BE, marrëveshja e Edi Ramës parashikon që kush blen një apartament mund të marrë një pasaportë shqiptare, pra të lëvizë në të gjithë zonën Schengen. Përse, Edi Rama është i gatshëm të sakrifikojë lëvizjen e lirë të Shqiptarëve? Përgjigja është e qartë, për të pastruar para”, theksoi Meta.
“Bashkimi Europian ka qenë i qartë dhe i prerë që ky projekt është në kundërshtim të hapur me Marrëveshjen e Stabilizim Asociimit mes Shqipërisë dhe BE-së. A mungojnë në Europë investitorët shumë të fuqishëm dhe seriozë që mund të investonin seriozisht dhe me transparencë në Portin e Durrësit? Cili është fati, kur do ndërtohet dhe a ka burim financimi për portin e ri të mallrave që do duhet të ndërtohet e që kushton mbi 1 miliardë e gjysmën Euro? Është shumë e qartë se projekti nuk është aspak strategjik, nuk është aspak turistik, dhe nuk është aspak transformues për potencialin turisitik të qytetit, sepse është qartazi një biznes ndërtimi apartamentesh duke grabitur pronën me strategjike të Shqipërisë”, tha ai.
