Kryetari i Bashkisë Divjakë, Fredi Kokoneshi dhe shoferi i tij, të cilët u plagosën ditën e sotme, janë jashtë rrezikut për jetën.
Lajmin e ka bërë të ditur mjeku kirurg i Spitalit të Lushnjës, Sami Osmani.
Osmani ka thënë se Kokoneshi ka marrë goditje në mushkëri, ndërsa shoferi i tij Gazmir Bullari, ka një thikë në bark, ndërsa i ka prekur zorrët dhe stomakun.
Ai theksoi se gjendja e tyre është jashtë rrezikut për jetën.
“Kryetari ka qenë i plagosur dhe u dërgua në Spitalin e Traumës. Shoferi ka dëmtime në stomak dhe zorrën e trashë, hyri në sallë, u përpunua dhe është jashtë rrezikut për jetën në reanimacion. Të dy të plagosurit janë jashtë rrezikut për jetën”, tha mjeku.
Aktualisht Kokoneshi është shtruar në Spitalin e Traumës, ku po merr mjekim të specializuar.
Si ndodhi ngjarja?
Kryetari i Bashkisë Divjakë, Fredi Kokoneshi është plagosur me thikë këtë të enjte bashkë me shoferin e tij, pas një konflikti me një ish punonjës të bashkisë.
Sipas informacioneve, ai kishte dalë për inspektim në një nga banesat pranë bashkisë së Divjakës në momentin që është konfliktuar me autorin Orges Xhelili.
Teksa kryebashkiaku ishte në inspektim, Xhelili është afruar dhe e ka fyer, ndërsa më pas debati mes tyre ka degraduar në përdorimin e thikës nga ana e autorit.
Me agresorin fillimisht është përleshur shoferi Gazmend Bullari, i mori një plagë në bark, duke i dëmtuar organet jetësore.
Mësohet se Orges Xhelili më herët ka punuar si punonjës IT pranë bashkisë së Divjakës për një periudhë të shkurtër.
Ende nuk janë bërë të qarta plotësisht arsyet e konfliktit mes tyre, ndërsa grupi hetimor pritet të zbardhë rrethanat e ngjarjes.
Autori është kapur dhe shoqëruar në komisariat, ndërsa forca të shumta policie janë në spital, ku ndodhen dy të plagosurit.
Njoftimi i policisë:
Rreth orës 09:30, në afërsi të bashkisë Divjakë, shtetasi O. Xh., 46 vjeç, dyshohet ka goditur me mjet prerës, shtetasin F. K., me detyrë Kryetar i bashkisë Divjakë dhe shoferin e tij, shtetasin G. B., 45 vjeç. Të dëmtuarit janë transportuar menjëherë dhe po marrin ndihmë mjekësore, në Spitalin Rajonal Lushnjë.
Falë veprimeve të shpejta operacionale të shërbimeve të Policisë, është kapur dhe shoqëruar në Komisariat, për veprime të mëtejshme procedurale, shtetasi O. Xh., si autor i dyshuar i plagosjes.
Në vendngjarje ndodhen drejtuesit më të lartë të DVP Fier.
Grupi hetimor, nën drejtimin e Prokurorisë, po punon për sqarimin e plotë të rrethanave të ngjarjes.
