Kryetari i Bashkisë së Divjakës, Fredi Kokoneshi raportohet se ka mbetur i plagosur pasi është goditur me thikë nga një persona.
Paraprakisht bëhet me dije se Kokoneshi ka pasur një debat me shtetasin Orgest Xhelili, i cili gjatë konfliktit e ka goditur me thikë.
Autori i ngjarjes është një ish-punonjës i sektorit të IT në bashkinë e Divjakës. Bashkëshortja e Xhelilit aktualisht punon si shefe e infermiereve në Poliklinikën e Divjakës, aty ku edhe raportohet se ka ndodhur edhe ngjarja, por ende janë të paqarta arsyet të cilat e shtyn atë që të plagoste kreun e bashkisë.
Sa i përket Kokoneshit, ai është dërguar në Spitalin e Lushnjës dhe ndodhet jashtë rrezikut për jetën. Ai është goditur në pjesën e shpatulllave dhe në krahë.
Veç kryebashkiakut, i plagosur ka mbetur edhe shoferi i tij, Gazmend Bullari.
Ndërkohë Spitali i Lushnjes dhe Poliklinika e Divjakës janë “blinduar” nga forca të shumta policie.
Njoftimi i policisë:
Rreth orës 09:30, në afërsi të bashkisë Divjakë, shtetasi O. Xh., 46 vjeç, dyshohet ka goditur me mjet prerës, shtetasin F. K., me detyrë Kryetar i bashkisë Divjakë dhe shoferin e tij, shtetasin G. B., 45 vjeç. Të dëmtuarit janë transportuar menjëherë dhe po marrin ndihmë mjekësore, në Spitalin Rajonal Lushnjë.
Falë veprimeve të shpejta operacionale të shërbimeve të Policisë, është kapur dhe shoqëruar në Komisariat, për veprime të mëtejshme procedurale, shtetasi O. Xh., si autor i dyshuar i plagosjes.
Në vendngjarje ndodhen drejtuesit më të lartë të DVP Fier.
Grupi hetimor, nën drejtimin e Prokurorisë, po punon për sqarimin e plotë të rrethanave të ngjarjes.