Policia e Shtetit ka dhënë detaje të reja mbi serën me kanabis të zbuluar ditën e djeshme në zonën e Beratit.
Drejtori i Policisë Kriminale në Drejtorinë e Përgjithshme të Policisë së Shtetit, Neritan Nallbati gjatë një deklarate për mediat ditën e sotme u mundua që ta “shesë” si sukses operacionin e policisë që deri më sot ishte në “gjumë” duke lejuar trafikantët që të ngrenë një nga punishtet më të mëdha të kanabisit në vend. Është e pamundur që ky aktivitet i paligjshëm të zhvillohet pa “bekimin” e uniformave blu pasi punishtja ishte ngritur në një zonë lehtësisht të aksesueshme dhe shumë pranë aksit nacional Fier – Berat.
Ndërkohë qe në realitet “bosët” e vërtetë të këtij aktiviteti kriminal janë zhdukur pa gjurmë, ndërsa policia i jep zë të bujshëm shoqërimit në komisariat të 150 grave (punonjëse) në këtë punishte kanabisi. Gjithashtu në pranga ka përfunduar edhe shtetasi Xhimi Dyli (pronar i tokës) i cili kishte dhënë me qira ambientin ku ishte ndërtuar kjo punishte e kanabisit. Gjithashtu policia ka shoqëruar edhe kryeplakun e fshatit Drenovicë, Sokol Kallmi pasi ky i fundit nuk kishte dhënë informacione mbi serat e kanabisit.
Këto janë “arrestimet e bujsheme” që ka bërë policia e shtetit gjatë 24 orëve të fundit ndërsa pronarët e vërtetë dhe “bosët” e këtij aktiviteti kriminal droge as nuk janë identifikuar aq më pak të arrestohen.
Punëtorët e arrestuar nga policia kanë korrur dhe paketuar rreth 6 hektarë ndërsa 2 hektarët e fundit të cilët po përgatiteshin për paketim u zbuluan dje nga agjentët e policisë. Sipas uniformave blu bëhet me dije se janë arrestuar 11 shtetas , ndërsa policia gjithashtu ka sekuestruar 875 kg lënde narkotike (hashash), pjesa me e madhe e paketuar dhe e bërë gati për tregtim.
Emrat e të arrestuarve të cilët ruanin ambientet me armë:
1-Jurgen Haxhi Ujkaj, i datëlindjes 11.07.1999, banues në Koplik
2-Bashkim Mehmet Mema, i datëlindjes 31.05.1974, banues në Zallher
3-Sidrit Zaim Bisha, i datëlindjes 24.06.1995, banues në Ishull Lezhë
4-Endrit Gëzim Xheka, i datëlindjes 03.02.1992, banues në Fushë Krujë Nikël.
5-Edison Bashkim Mema, i datëlindjes 17.03.2002, banues në Zallher
6-Mirvaldo Mondi Disha, i datëlindjes 03.11.1998, banues në Nikël Fushë Krujë
7-Hamdi Veli Dyli, i datëlindjes 25.12.1986, banues në Dronovicë, pronari që kishte lënë me qira serat.
8-Blerim Beqir Xheka, i datëlindjes 18.02.1980, banues në Nikēl Fushë Krujë
9-Samuel Gëzim Lushaj, i datëlindjes 11.04.2000, banues në Shkodër.
Njoftimi nga Policia e Shtetit:
“Drejtori i Departamentit të Policisë Kriminale në Drejtorinë e Përgjithshme të Policisë së Shtetit Drejtues i Lartë, Neritan Nallbati dhe prokurorët e Prokurorisë pranë Gjykatës së Shkallës së Parë Berat, deklaratë për shtyp, për megaoperacionin policor të koduar “Stuhia”, të zhvilluar në Berat, ku u sekuestruan 870 kilogramë lëndë narkotike kanabis sativa, 3 armë zjarri dhe sende që shërbenin për përpunimin dhe ambalazhimin e lëndës narkotike, si dhe u vunë në pranga 11 shtetas.
Përshëndetje,
Jam sot këtu, së bashku me prokurorët e Prokurorisë pranë Gjykatës së Shkallës së Parë Berat Albiona Papajani, Eni Çulli dhe me kolegët e mi, me qëllim informimin e publikut, në lidhje me një megaoperacion policor, në qarkun e Beratit.
Siç jeni në dijeni nga komunikimet e përditshme, strukturat e Policisë së Shtetit në të gjithë vendin, vijojnë kontrollet e pandërprera të territorit për parandalimin, evidentimin dhe goditjen e kultivimit të bimëve narkotike.
Si rezultat i punës hetimore dhe profesionale, të kryer nga Departamenti i Policisë Kriminale në Drejtorinë e Përgjithshme të Policisë së Shtetit, mbështetur dhe me inteligjencë informative, rezultoi se në territorin e fshatit Rërëz, në disa sera në pronësi të shtetasit H. D., kryhej procesi i përpunimit të bimëve narkotike, të kultivuara më parë në këtë zonë.
Bazuar në informacionet e grumbulluara, në orët e para të mëngjesit të datës 10.11.2022, nga Drejtoria kundër Narkotikëve dhe Trafiqeve, Drejtoria e Forcës së Posaçme Operacionale në Departamentin e Policisë Kriminale, me mbështetjen e Forcave të Ndërhyrjes së Shpejtë dhe në bashkëpunim të ngushtë me Prokurorinë pranë Gjykatës së Rrethit Gjyqësor Berat, u finalizua megaoperacioni policor i koduar “Stuhia”.
Nga finalizimi i këtij megaoperacioni, në territorin e fshatit Rërëz, u lokalizuan serat për të cilat Policia e Shtetit dispononte informacion se brenda tyre kryhej procesi i përpunimit të bimëve narkotike, si dhe ambalazhimi i lëndës narkotike.
Shërbimet e Policisë kanë kapur në brendësi të serave, dhe kanë arrestuar në flagrancë 11 shtetas të cilët dyshohet se janë organizatorët e kësaj veprimtarie kriminale, konkretisht:
– H. D., 36 vjeç (pronari i tokës ku ishin vendosur serat), E. Xh., 30 vjeç, B. Xh., 42 vjeç, S. L., 22 vjeç, J. U., 23 vjeç, M. D., 24 vjeç, S. B., 27 vjeç, B. M., 48 vjeç dhe E. M., 20 vjeç, D. M., 43 vjeçe dhe I. M., 25 vjeçe.
Nga veprimet operacionale të kryera nga shërbimet e Policisë, në kushtet e flagrancës, shërbimet gjetën dhe sekuestuan edhe 3 armë zjarri, konkretisht 2 pistoleta dhe 1 kallashnikov, të cilat i posedonin shtetasit e arrestuar, B. Xh., H. D. dhe J. U.
Në ambientet e brendshme të serave janë gjetur disa shtetase, nga zonat periferike të Tiranës, të cilat kryenin përpunimin dhe ambalazhimin e lëndës narkotike kanabis.
Këto shtetase janë shoqëruar në ambientet e Drejtorisë Vendore të Policisë Berat, për veprime të mëtejshme hetimore, me qëllim dokumentimin e plotë të kësaj veprimtarie kriminale, nxjerrjen e përgjegjësive dhe evidentimin e rolit të secilës prej tyre në këtë veprimtari kriminale.
Në vijim të këtij megaoperacioni, shërbimet e Policisë gjetën në brendësi të serave dhe sekuestruan në cilësinë provës materiale,
700 arka të mbushura me bimë narkotike kanabis, në proces përpunimi dhe 8 thasë të mbushur me boçe kanabisi, me peshë totale rreth 870 kilogramë lëndë narkotike. Gjithashtu, nga kontrolli ne brendësi të serave, janë gjetur dhe sekuestruar mjete të ndryshme që shërbenin për përpunimin dhe ambalazhimin e lëndës narkotike, 4 automjete dhe një numër i madh aparatesh celulare të shtetasve të arrestuar, si dhe të shtetaseve të cilat u gjetën në sera, duke përpunuar bimët narkotike.
Nga veprimet e para hetimore, nën drejtimin e Prokurorisë së Beratit, rezulton se këto sera kanë shërbyer për prodhimin dhe përpunimin e bimëve narkotike, si dhe për ambalazhimin e lëndës narkotike, me qëllim trafikimin e saj.
Për hetimin e plotë të këtij rasti është ngritur një grup i posaçëm hetimor, i kryesuar nga Prokuroria pranë Gjykatës së Rrethit Gjyqësor Berat, me specialistët e Drejtorisë kundër Narkotikëve dhe Trafiqeve dhe të Drejtorisë së Standardeve Profesionale, në Drejtorinë e Përgjithshme të Policisë së Shtetit.
Vijojnë veprimet e thelluara, nga grupi i posaçëm hetimor, për këtë megaoperacion dhe për arsye hetimore, nuk mund të bëjmë me dije, detaje të tjera rreth këtij megaoperacioni.
