Deputeti i Partisë Demokratike, Belind Këlliçi hodhi akuza në drejtim të mazhorancës e cila është përgjegjëse për krizën ekonomike në të cilën është “zhytur” vendi ynë.
Nga foltorja e Kuvendit, Këlliçi dënoi gjuhën banale të kryeministrit Edi Rama ndaj opozitës, ndërsa theksoi se Tiranës i mungon kryebashkiaku. Sipas Këlliçit, Veliaj është i përfshirë në atë që ai e quajti “mafien e betonit” duke rritur 10-fish taksën e ndërtimit në kryeqytet ku çmimet e apartamenteve kanë kapur vlera të padëgjuara më parë.
“Nuk mund të niste më keq se kaq kjo seancë, kur diskutanti i parë sulmoi opozitën se po kërkon rritje pagash. Unë sot dua ta nis fjalën duke iu drejtuar deputetëve të maxhorancës, sidomos atyre që me mllef i drejtohen Zotit. Dua të di pse nuk dëgjohen shoqatat e ekspertëve dhe biznesit? Seanca e ditës së djeshme dhe e sotme është formale, juve ju nuk interesojntë aspak diskutimet, i keni gati kartonat. Kryeministri Edi Rama u drejtua dje me banalitete dhe fjalë rruge. Kjo shfaqje e ka një motiv, të lënë gjithçka që kanë në dorë dhe të dëgjojnë se si Rama sulmon opozitën. Keni marrë sot flamurin e SHBA-ve dhe e tundni në çdo seancë plenare. Ju e keni rrëzuar parlamentarizmin që nga viti 2013, kur Rama shkeli në Kuvend. Dje foli dhe si kryebashkiak. Premtoi dhe kredi të butë për apartamentet. A ka kryetarë bashkie ky qytet? Pse nuk e bën ai këtë premtim? A ka apartamente stok? Ka nevojë për para mafia e betonit? Taksën e ndërtimit Veliaj e ka rritur 10 herë. Dhe është taksë mbi vlerën e shitjes dhe jo mbi vlerën e ndërtimit siç duhet të jetë. Ndaj një të riu i duhen dy jetë për të futur kokën në shtëpinë e tij. Kostot e bujqve janë rritur me 150%. Favorizon lobet importuese. Pse për dyfishim buxheti, kur në fakt janë dyfishuar çmimet. Pensionistët duhet të dinë që çmimet do të vijojnë të rriten”, tha Këlliçi.
