Në konferencën e sotme për mediat kryedemokrati Sali Berisha iu përgjigj pyetjeve të gazetarëve lidhur me seancën për “Vulën” e PD në Gjykatën e Apelit, por edhe raportin me grupin e deputetëve të Enkelejd Alibeaj pas dështimit të negociatave për të dalë me një kandidat të përbashkët në zgjedhjet lokale.
Sa i përket vendimit të Apelit, Berisha tha se kryeministri Edi Rama po përpiqet të ndikojë te Gjykata në mënyrë që të favorizojë një palë dhe theksoi se nuk do të ketë konflikt brenda demokratëve për këtë arsye.
“Edhe njëherë çështja vula dhe flamuri në gjykatë do i jepen atij që i takon. Gjykatësi ka vendosur. Nuk ka forcë që pengon regjistrimin. Edi Rama bën përpjekje në ekstrem për të përdorur gjykatës. Njerëzit e kanë kuptuar se çfarë katastrofe është precedenti i shpalljes palë i atyre që nuk janë palë. Nuk ndodh në botë kjo. Ndodh vetëm në labirintet skizoide të Edi Ramës. Por ai do përballet personalisht me pasojat. Nuk merremi me asnjë tjetër”, tha Berisha.
I pyetur më pas pse fajëson vetëm Ramën dhe jo Alibeajn që apsiron tashmë të nxjerrë kandidatë në zgjedhjet e 14 Majit dhe raportin e këtij grupi deputetësh me ish-kryetarin Lulzim Basha, kreu i PD tha se në demokraci çdokush është i lirë.
“Në një vend të lirë, çdo njeri ka të drejtat e tij. Vepron por nuk ndalon asnjë që merr vendimet që do. Momenti kur nuk pranoi që të qëndrojë si anëtarë i PD, të kandidojë siç po ndodh, ata bëjnë zgjedhjen e tyre, unë nuk ua këshilloj”, tha Berisha.
Më tej ish-kryeministri referuar grupit të Alibeajt shtoi se “jo të gjithë anëtarët do ta duan liderin e partisë”, pasi kjo sipas Berishës do të bënte kryetarin shumë të rrezikshëm.
“PD është një parti Demokratike. Ju them se nuk ka parti të vërtetë demokratike, në të cilën një pjesë e anëtarëve se duan fare kryetarin. Por e pranojnë për shkak të rregullave, pasi ai grup do të donte një kryetar tjetër. Në këtë kontekst, nëse kryetari mendon se ai detyrimisht duhet të ketë dashurinë e të gjithë anëtarëve, ai është joreal dhe kryetar i rrezikshëm. Në këtë kontekst, e quaj gjënë më normale që të ketë eksponent, drejtues që nuk janë dakord me drejtimin e Berishës, apo me mënyrën se si e drejton dhe paraqet. Nga ana tjetër janë të detyruar në përputhje me statutin, t’i përmbahen statutit”, deklaroi Berisha.
