Tiranës i mjafton një gol për të parakaluar Partizanin në javën e 11 të Kategorisë Superiore ku të kuqtë regjistruan një tjetër disfatë, këtë herë në fushën e Laçit duke zbritur për herë të parë nga froni pikërisht në favor të bardhebluve.
Ndeshjet e së enjtes shkuan në favor të skuadrës kampione që fitoi një ndeshje shumë të vështirë përballë Egnatias që vinte në formë të shkëlqyer. Në “Selman Stermasi” vendosi një gol i brazilianit Partick, rrjeta e dytë rresht për sulmuesin bardheblu që i dhuron 3 pikë ekipit të Orges Shehit që ngjitet në kuotën 21 dhe lë pas Partizanin me 19.
Të kuqtë morën një tjetër shuplakë pas asaj të Rrogozhinës dhe këtë herë është Laçi që regjistron suksesin e tretë rresht duke hedhur përfundimisht pas krahëve krizën e fillim-sezonit. Në Kurbin vendosi goli i Ujkës. Ndeshje pa shumë ritëm por e kujdesshme për të dyja skuadrat por Giovanni Colella duhet të bëjë llogaritë me një tjetër disfatë që dhemb dhe tashmë është i detyruar ta vazhdojë kampionatin si ndjekës.
Ndërkohë, në Kukës, Vllaznia zhyt në krizë të thellë skuadrën verilindore. Shkodranët triumfuan me një gol të shënuar nga Esin Hakaj në fundin e pjesës së parë.
Klasifikimi:
