Teksa shqiptarët po ikin masivisht nga vendi, Qeveria ka thjeshtuar burokracitë për regjistrimin e punonjësve të huaj. Një udhëzim i Ministrisë së Financave, i marrë që më 22 qershor, por i publikuar këtë të Mërkurë në Fletoren Zyrtare redukton si kohën, ashtu edhe procedurat.
Sipas udhëzimit, të huajt mund të deklarohen vetë, ose përmes punëdhënësit të tyre në sistemin online të Agjencisë Kombëtare të Punësimit. Deklarimi duhet të bëhet brenda 7 ditëve nga nisja e punës.
Konfirmimi jepet përmes rrugëve elektronike brenda pesë ditëve nga ana e autoriteteve. Dokumentacionet që kërkohen janë mjet identifikimi dhe kontrata e punës.
Numri i të huajve me leje qëndrimi në Shqipëri gjatë vitit të kaluar ishte rreth 15 mijë. Në krahasim me vitin 2020, rritjen më të madhe e kishin shtetasit nga Bangladeshi me 5 herë më shumë.
Nga ana tjetër, raportet e herëpashershme flasin për shifra të larta të largimit të shqiptareve nga vendi.
Një valë e re emigrimi e të rinjve shqiptarë është një nga shkaqet kryesore të mungesës së fuqisë punëtore vuri në dukje Banka Botërore në raportin e fundit për zhvillimet rajonale.
Një raport i fundit i Eurostat konstatoi rritjen e numrit të aplikimeve për azil të shqiptarëve, madje në disa raste duke ua kaluar dhe shtetasve nga Ukraina, që është në luftë. Të dhënat e Eurostat tregojnë se në gusht aplikimet për azil nga shqiptarët ishin gati 1100 ndërsa të Ukrainës në korrik ishin 950. Për më tepër që Ukraina ka një popullsi prej 43 milionë banorësh.
Sipas të dhënave paraprake të Eurostat për periudhën janar- gusht 2022 janë regjistruar gjithsej 6,860 aplikime për azil në BE nga shtetasit shqiptarë, me një rritje prej 68% në krahasim me të njëjtën periudhë të vitit të kaluar.
Destinacionet kryesore ku shqiptaret kërkojnë azil janë Franca, me 46% të aplikimeve dhe Gjermania, me 12%.
