Kreu i Partisë së Lirisë, Ilir Meta ka publikuar një video nga një takim i kryeministrit Rama në Kolonjë.
Në videon e publikuar në FB, një djalë i ri i është ankuar Ramës për gjendjen në shkolla.
“Ja si i del boja fasadës së investimeve të “Rilindjes” në Arsim përmes të vërtetave të thëna hapur nga ky nxënës kurajoz në Ersekë, të cilin censura nuk mundi ta ndalonte dot”, shkruan Meta.
Meta thotë se për shkak të Rilindjes, arsimi sot është më i braktisur, më i politizuar dhe më i rrënuar se kurrë.
“Për shkak të Rilindjes, Arsimi sot është më i braktisur, më i politizuar dhe më i rrënuar se kurrë.
Braktisja e Arsimit tregohet qartasi me mosmbështetjen buxhetore për arsimin, me investimet gjysmake, e tregon shpërfillja për mësuesit, pedagogët dhe për kërkimin shkencor. Bëhen ndërtesa për t’u dhënë tendera klientëve të Rilindjes, por nuk ka laboratorë, palestra, banka dhe mjete mësimore bashkëkohore”, shkruan bashkangjitur videos Meta.
Ish-presidenti shkruan se për Partinë e Lirisë, Arsimi është prioritet i prioriteteve kombëtare.
“Për Partinë e Lirisë, Arsimi është prioritet i prioriteteve kombëtare dhe do të jetë prioriteti i parë sa herë të diskutohet Buxheti i Shtetit.Nuk ka zhvillim pa Arsim! Gjithçka për të rinjtë!”, përfundon Meta.
