Një eurodeputet francez ka bërë një sërë postimesh provokuese nga Kosova, ku është ndalur të vizitojë qytetin historik të Prizrenit.
“Qyteti i mbretërve serbë”, është etiketimi që Nicolas Bay, anëtari i partisë me tipare të së djathtës ekstreme, “Reconquête”, drejtuar nga ultra-nacionalisti francez, Eric Zemmour i bën Prizrenit.
Ai ka shkruar në Tëitter se qyteti u “okupua nga shqiptarët myslimanë”, duke shprehur në këtë mënyrë hapur urrejtjen për kombin tonë.
“Prizreni, një qytet evropian dhe ish-qyteti i mbretërve të Serbisë, tani është i pushtuar nga shqiptarët myslimanë. Në këtë tokë të Evropës, kishat janë zëvendësuar nga xhamitë. Ndërkohë, qeveritë perëndimore kanë parë nga ana tjetër”, ka shkruar Bay.
Nga rrjetet sociale vërehet se politikani ekstremist francez ka vizituar monumente të ndryshme fetare dhe ka takuar edhe deputetin e Partisë Progresiste serbe e udhëhequr nga presidenti i Serbisë, Aleksandër Vuçiç, Jovan Palalic.
Me të, Bay pretendon se ka diskutuar për situatën aktuale politike si në Serbi ashtu edhe në Kosovë.
Bay i cili është është zëvendës-presidenti i partisë “Reconquête” që në thelb ushqen urrejtje ndaj emigrantëve të cilët jetojnë në Francë duke i cilësuar këta të fundit si “hajdutë”, “përdhunues” e “vrasës”, gjatë turit të tij në Beograd ka shpërndarë një fotografi të një objekti të shkatërruar, siç pretendon ai nga bombardimet e NATO-s në vitin 1999, duke pyetur se “cili ishte faji i Serbisë për këtë?”.
“Midis 24 marsit dhe 8 qershorit 1999, avionët e NATO-s bombarduan Beogradin. Serbia ka dashur të ruajë identitetin dhe pavarësinë e saj kombëtare”, shkruan ai.
Për eurodeputetin francez populli serb në Kosovë, “po lufton për të mos u zhdukur nga territori i vet, Kosova”.
