Deputetet e opozitës kanë braktisur seancën e komisionit paralamentar të sigurisë këtë të Premte, ku ishte thirrur për të raportuar kreu i AMP-së Ardiu Veliu, lidhur me buxhetin e vitit 2023.
Për deputetët e opozitës, Veliu duhet të ishte para drejtësisë dhe jo në krye të një institucioni.
“Ky ka vrarë njerëz, ka manipulu ngjarje”, u shpreh deputeti demokrat Ervin Salianji.
Ligjvënësi tjetër demokrat Flamur Noka tha se Veliu manipuloi ngjarjen në Elbasan para zgjedhjeve të fundit parlamentare ku u vra një person, vrasjen e Klodian Rashës nga një efektiv policie në detyrë si dhe ngjarjen në Tiranë ku mbeti i vdekur Lear Kurti.
“Sot, para deputetëve është ulur një ish-oficer police dhe drejtues police, aktualisht drejtues i AMP, është ulur një individ i cili në rast se në këtë vend do kishte shtet dhe demokraci, nëse do kishte drejtësi. Është manipuluar ngjarja e Elbasanit dhe fakte dhe prova, vrasja e Klodian Rashës, u etiketua si armik, pa u bërë disa orë nga vrasja e Laer Kurtit vrapoi ky person që të manipulojë ngjarjen dhe ta shpallë kriminel të vdekurin, standardi juaj është që kriminelët ti bëni drejtor, krimit t’i jepni pushtet, ky nuk është standardi i shqiptarëve dhe opozitës dhe refuzojmë ta pranojmë një kriminel me uniformë të na raportojë në emër të ligjit, ai duhej të ishte viktimë e ligjit”, iu drejtua Noka deputetëve të mazhorancës.
Pas debateve të deputetëve demokratë me kreun e komisionit Nasip Naço dhe akuzave të opozitës ndaj Veliut, deputetët e opozitës, në shenjë revolte, braktisën seancën.
Ndërkohë, Veliu vijoi me raportimin në komision para deputetëve socialist që mbetën në seancë.
