Këshilli i Ministrave ka miratuar dy vendime që i japin shoqërisë shtetërore KAYO të drejtën të hyjë në negociata për lidhjen e marrëveshjeve me dy kompani të huaja për prodhimin e mjeteve lundruese dhe dronëve ushtarakë.
Sipas ministrit të mbrojtjes Ermal Nufi, ky zhvillim konsiderohet një hap i rëndësishëm për industrinë e mbrojtjes në vend.
“Miratimi i dy VKM-ve për autorizimin e shoqërisë KAYO për të negociuar me dy kompani për prodhimin e mjeteve lundruese dhe dronëve është domethënës. Është hera e parë që krijohet mundësia për prodhimin e mjeteve lundruese. Jemi afër finalizimit të marrëveshjeve. Kjo do të jetë nxitje jo vetëm për industrinë ushtarake, por edhe për punësimin dhe krijimin e një hapi të mirëfilltë të ndërtimit të mjeteve lundruese”, tha ministri i Mbrojtjes.
Ndërkohë, vendimet për KAYO-n vijnë në një moment kur kjo e fundit është përfolur gjerësisht për afera dhe lidhje korrupsioni.
Në gusht të vitit të shkuar KAYO mori në përdorim godinat e ish-Uzinës së Autotraktorëve, por deri më tani ende nuk ka nisur aktivitete konkrete në terren. Kujtojmë se për t’i hapur rrugë këtij projekti, disa televizione u larguan me dhunë nga godina ku ushtronin aktivitetin, për t’ia lënë vendin kësaj nisme.
Çfarë është kompania “KAYO” në letra dhe cili është objektivi i saj
Kompania e prodhimit të armëve “KAYO” është regjistruar në Qendrën Kombëtare të Bizneseve në datë 16 tetor të vitit 2024, kurse data e themelimit të kompanisë është 24 shtatori 2024. Kompania KAYO do të drejtohet nga një bord me 7 anëtarë, teksa administrator do të jetë ish-drejtori i përgjithshëm i Policisë së Shtetit, Ardi Veliu. Ajo është krijuar me një kapital fillestar, prej 150 milionë lekësh.
Shoqëria “KAYO” ka objekt veprimtarie projektimin, prodhimin, riparimin, demilitarizimin, asgjësimin dhe tregtimin,brenda dhe jashtë vendit, të të gjitha llojeve të armëve ose pjesëve të armëve, përfshirë edhe armët ushtarake, të municioneve, të teknologjive dhe pajisjeve ushtarake, uniformat, mjetet, pajisjet dhe sistemet e armatimit e komunikimit si dhe çdo aktivitet të lidhur me këtë veprimtari, në funksion të politikave kombëtare të sigurisë e mbrojtjes dhe rritjes së kapaciteteve ushtarake. Përgjatë zhvillimit të veprimtarisë së saj, Shoqëria ndjek gjithashtu interesa ekonomikë dhe tregtarë.
LEXO EDHE:
