Prej javësh, vijon bojkoti i mësimit dhe protesta e pedagogëve, kërkesat e të cilëve drejtuar qeverisë mbeten të paplotësuara.
Këtë të Martë, një grup pedagogësh mbajnë një fjalë për mediat para Universitetit Politeknik, duke njoftuar se bojkoti do të vijojë deri në plotësimin e kërkesave të tyre.
Kreu i sindikatës së pedagogëve bëri me dije se deri në orën 11:00 do të ketë një tryezë me akademikë, aktivistë e përfaqësues të institucioneve arsimore me qëllim daljen me një platformë për arsimin.
Akademikët i kanë dërguar një peticion me disa kërkesa qeverisë. Ata kërkojnë rritje 50 për qind të pagave bazë sipas titujve shkencorë në dy faza, vlerësime për vjetërsinë në punë mbi 15 vjet dhe për orët e mbingarkesës shtesë në mësimdhënie, rritje të financimit për kërkimin shkencor, rivlerësim të orës mësimore leksion e seminar, rishikim të tatimit prej 23% mbi pagesën e ngarkesës shtesë, si dhe transparencë mbi buxhetin dhe të ardhurat e universiteteve publike.
