Ish-deputeti Lefter Maliqi ka hedhur akuza të forta në drejtim të Policisë së Shtetit për të cilën tha se ka vrarë Lear Kurtin, i cili mbrëmjen e 19 tetorit dyshohet se është dhunuar nga uniformat blu dhe më pas u shoqërua në drejtim të komisariatit nr.3 në Tiranë.
Gjatë intervistës për “Ora News”, Maliqi tregon se e njihte nga afër Lear Kurtin pasi jetonin në një lagje dhe sipas tij 32-vjeçari ishte një djalë i mrekullueshëm. Maliqi theksoi se vdekja e Kurtit është një vrasje shtetërore.
“Ky i fundit (Lear Kurti) për mua është vrarë nga këta militantë politik, jo policia e shtetit por militantë politikë. Jo më kot ju bë autopsia menjëherë. Ky ishte njeri i mrekullueshëm, jetonte në lagjen që jetoj unë. Nuk kam pasur bisedë por si figurë dhe nga qytetarët te njësia 7 njeri që merrej me sport, shikonte punën e vet, i rritur jetim. Dhe e kishte makth policin e shtetit. Të jeni të bindur që kjo është një vrasje shtetërore por kemi polic të emëruar politikë”, u shpreh Maliqi.
Lear Kurti humbi jetën pasi u shoqërua nga efektivët në komisariatin nr.3. Atij iu kërkua të ndalonte në orën 23:07 të mbrëmjes së 19 tetorit nga efektivët, në rrugën “Riza Çuka” në Laprakë, por vrapoi dhe u largua. Siç sqarohet në njoftimin e policisë, i riu është kapur pas ndjekjes, është dërguar në komisariat, ku ka shfaqur problemet e para shëndetësore.
Fillimisht u aludua se i riu vuante nga epilepsia, më pas, në deklaratën zyrtare u tha se i riu kishte gëlltitur një qese me lëndë narkotike. kontradikta është në faktin që efektivët pretendojnë se ka ndërruar jetë në spital, ndërsa bluzat e bardha të Traumës thonë se Kurti ka mbërritur pa shenja jete në duart e tyre.
Paraprakisht, nga hetimet e deri tanishme, është deklaruar se në trupin e viktimës nuk kishte shenja dhune. Por për kryedemokratin Sali Berisha, Kurti u vra nga Policia dhe ngjarja po mundohet që të mbulohet ashtu si rasti i Klodian Rashës, 2 vite më parë, i cili u qëllua për vdekje nga një efektiv policie.
