Një tjetër protestë do të zhvillohet këtë të Dielë përballë Ministrisë së Brendshme për vdekjen e Lear Kurtit.
Kryetari i Partisë Demokratike, Sali Berisha ka ndarë posterin e protestës së sotme, e cila do të zhvillohet në orën 18:00.
Berisha thotë se protesta e sotme do të jetë e fuqishme për të dënuar vdekjen me dhunë të Kurtit, nga policët e droguar të Ramës dhe të Çuçit.
‘Sot, në ora 18:00, protestë e fuqishme për vdekjen me dhunë të të riut, Lear Kurtit nga policë banditë të droguar të Ramës-Çuçit, dhe vrasjen e tij për së dyti nga krimineli i tyre me uniformë, Ardi Veliu. sb’– shkruan Berisha në FB.
Kurti humbi jetën pasi u shoqërua nga efektivët në komisariatin nr.3. Atij iu kërkua të ndalonte në mbrëmjen e së 19 tetorit nga efektivët, në rrugën “Riza Çuka” në Laprakë, por vrapoi dhe u largua.
Siç sqarohet në njoftimin e policisë, i riu është kapur pas ndjekjes dhe është dërguar në komisariat, ku ka shfaqur problemet e para shëndetësore.
Fillimisht u aludua se i riu vuante nga epilepsia, më pas, në deklaratën zyrtare u tha se i riu kishte gëlltitur një qese me lëndë narkotike. Efektivët pretendojnë se ka ndërruar jetë në spital, ndërsa bluzat e bardha të Traumës thonë se Kurti ka mbërritur pa shenja jete në duart e tyre.
Për kryedemokratin Sali Berisha, Kurti u vra nga Policia dhe ngjarja po mundohet që të mbulohet ashtu si rasti i Klodian Rashës, 2 vite më parë, i cili u qëllua për vdekje nga një efektiv policie.
