Artur Kurti, babi i 32-vjeçarit që vdiq pas shoqërimit nga policia, Laer Kurtit, ka folur për ngjarjen e rëndë që i ndodhi djalit të tij në ambientet e Komisariatit nr.3 në Tiranë.
Në një intervistë për Top Channel, Artur Kurti ka deklaruar: “Nuk e kam parë trupin e djalit, Kam qenë gjithë natën jashtë morgut dhe sot dhe nuk më kanë dhënë asnjë lloj shpjegimi”.
Pyetje: A të kanë kontaktuar autoritetet?
Babai: Cilat autoritete? Ato që e kanë mbytur?! Ku ka këtu shtet. Gjeta ata të shkb-së aty më thanë nuk dimë gjë, kur të bëhen ato… nga ora 10 ose 11 do të të themi.
Pyetje: Të thanë çfarë ka ndodhur?
Babai: Jo s’më dhanë asnjë përgjigje.
Pyetje: Ku ishte Laerti?
Babai: Në rrugë të zotit ka qenë o motra ime. Nuk ka qenë asnjë person i rrezikshëm për ta trajtuar në ato lloj formash.
Pyetje: A ka pasur djali yt probleme shëndetësore?
Babai: Jo asgjë. Djali ka qenë 2 metra si luan.
- Ngjarja e rëndë
Personi që shihni në foto është 32-vjeçari Laer Kurti, i cili ndërroi jetë në ambientet e komisariatit Nr.3 të Policisë së Tiranës. Kurti dyshohet se ka humbur jetën në duart e efektivëve të policisë, në momentin që është shoqëruar nga patrulla pas një ndjekje nga rruga “Riza Cuka” në zonën e Don Boskos.
Teksa AMP pretendon se Kurti është transportuar me shenja jete por me puls të dobët në Spitalin e Traumës, bluzat e bardha pretendojnë të kundërtën duke hedhur hije të forta dyshimi mbi mënyrën sesi policia ka proceduar me rastin në fjalë.
Gjithashtu, aktualisht po kryhen ekzaminimet mjeko-ligjore për përcaktimin e shkakut të vdekjes dhe në përfundim AMP do të dalë me një njoftim përfundimtar për shtyp.
Menjëherë pas ngjarjes, kryetari i Partisë Demokratike Sali Berisha ka bërë një reagim të fortë për vdekjen e të riut të cilin e ka quajtur si një “krim të shëmtuar” brenda komisariateve të policisë.
Duke iu referuar denoncimit nga “qytetari dixhital”, Berisha jep disa detaje të rëndë duke theksuar se vdekja e Laer Kurtit ka ardhur si pasojë e dhunës së ushtruar nga efektivët e policisë ndaj 32-vjeçarit.
